Hmunphiah ro hralhna tur hre lo

Hmunphiah hring an hralh thei tawh lo a, a ro an hralh thei lo mek bawk; Vairengte-a hmunphiah thartute’n harsatna an tawk mek.
“A hring hi chu kan hralh thei lo sa kha a ni a, a ro pawh kan hralh thei lo. Kan chhek hner hnur mai,” hmunphiah thartu pakhat chuan a ti.
Vairengte atanga thu dawn danin, Thawhlehni khan mazon-te’n hmunphiah ro hi kg-ah Rs 60-a lei an dil a, a tlawm em avangin a neitute’n an phal lo.
Nikum lamah a ro hi kg-ah Rs 140-150 velin an hralh a, nikum hmasaah kg-ah Rs 160-170 velin an hralh.
Hmunphiah hi a hring pawh kar hmasa tawp lam atang khan an hralh tawh lo a, kg-ah Rs 13 te a nih hnu-ah a leitute’n an lei chhunzawm tawh lo. Chutih laiin chhungkaw engemaw zatin a ro an nei a, chu pawh a man a tlawm avangin an hralh phal lo.
“Kg-a Rs 60 chuan a ngaihna a awm lo, rate a chhe lutuk. Mahse kan lo pho ro ve laklawh tawh si a, kan en ngawih ngawih mai a nih hi,” hmunphiah thartu pakhat chuan a ti.
A ro nei hi an awm nual tih a sawi a, kum dangah pawh a hringa hralh leh a rova hralh an awm thin thu sawiin, kuminah sorkarin a ro rate tur te a siam avangin kuminah an lo pho ro tih a sawi a, quintal 30 quintal 40 nei an awm nual tih a sawi bawk.
Thu dawn danin, Vairengte-ah hian hmunphiah keh loh a la tam a, a man tlawm vang leh hralhna tur an hriat loh avanga kek lo an ni tih an sawi.