Sawrkarin Project Monitoring Committee chak tak a neih bakah mipuiin thil fel lo an hriat an thlen theihna tur “Mipui Aw” an neih bawk avangin tumahin hna an thawh chhiat duh a ring tawh lo tih chief minister Lalduhoma chuan a sawi.
Mamit NGO Coordination Committee hruaitute chuan Thawhtanni khan chief minister hi a office-ah kawmin, an district huamchhunga sawrkar hmalaknaa hnathawh chungchang an sawipui.
Chief minister chuan sawrkarin Project Monitoring Committee chak tak a nei a. Mipuiin thil fel lo an hriatte thlen zung zung theihna tur “Mipui Aw” a awm bawk a. Tun hnuah chuan tumah in hna an thawh chhiat duh a ring tawh lo, tiin, a kaihhruai sawrkarah tha taka hna kalpui an tum tih a lo hrilh.
NGO Coordination Committee hian Mamit to Bairabi kawng zawn mek chu Mamit town huamchhung si, khawsir deuha kal tura zawn a ni a. Hei hi Mamit Bypass Road tha tak a nih avangin tha an ti hle tih chief minister hi an hrilh a. Aizawl to Mamit inkar kawng laih meka thil fel lo nia an hriat, an rawtna leh Highway atanga Mamit khawchhung luhna kawng tih zauh a tul thu an thlen bawk.
Hna a chhiat ka ring tawh lo – CM
