Daily Newspaper

Hnahlan ram phaizawl hman tangkai dan tur en

10

Champhai district bawrhsap Maria CT Zuali leh line department official-te chuan India leh Myanmar ramri dep Tiau kama awm Laili Phai Hnahlan chu tlawhin, leilet phaizawl tangkai lehzual hman a nih theihna tura mamawh leh hmalak theihna tur kawng hrang hrangte village leh loneitute nen an enfiah.

Bawrhsap chuan loneitute tan Champhaia kala office dawr a harsat avangin a hmuna kalchilha loneitute hmalakna enfiah an ni tih a sawi a. Champhai district-a leilet phai awmte tangkai taka hman a nih theihna’n line department hrang hrangte tanghoa hma lak tum a ni tih a sawi.

Hnahlan atanga Laili Phai panna kawng, FOCUS Project kaltlanga siamthat tum enfiah a ni a. Laili Phai chawmtu ber Tuilak lui, Minor Irrigation project hmanga tui lakna pawh enfiah nghal niin, loneitute chu a chhawr tangkaitu an nih angin a enkawl leh venhim kawngah tan la lehzual turin a chah. Blue Revolution hnuaia sangha khawi mi pathumtehmunhma pawh enfiahsak an nih bakah Pradhan Mantri Matsya Sampada Yajona kaltlanga sangha dil siam dilte pawh enfiah sak nghal an ni.

Heng bakah hian leilet phaia thlai chinte ran laka a him theihna tura a hungna siam a nih theih dan tur bakah leilet bial te lutuk thiata tihlen a nih theih dan tur sawi hoa enfiah nghal a ni a. Loneitute chu an hnathawhna hmunahte kalchilh niin mamawh leh harsatna an thlente mithiamten an enfiah pui a, tuilakna pipe mamawhte chu DAO-in pek an nih tur thu a hrilh bawk.

Fostering Climate Resilient Upland Farming Systems in the North East (FOCUS) project hmalaknain Hnahlan khuaah thlasik thlai ching tura hma lak a ni a; FOCUS WRC FIG member chhungkaw 110 te zikhlum, parbawr leh tomato te chintir an ni. Champhai district chhungah Hnahlan Circle chu hetiang thlai chi ching tura thlan an ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy