Hnahthiala National Highway-54 kawng thawmthat leh by pass road laih meka hmalak tawh chin leh bawhzui zel dan tur relin Thawhlehni khan Hnahthial district bawrhsap Rita Lalnunmawii Pachuau hoa thutkhawm a ni a. Addl. DC Zothanmawia Khiangte, Sub Hqrs YMA hruaitute, NHIDCL, ABCI, Mathiyan bakah Tuipui D, Rotlang East leh Leite VC an tel.
Bawrhsap chuan Hnahthiala national highway-a hmalaknaah thawhho that a tul tih a sawi a. NHIDCL a ni emaw ABCI leh Mathiyan pawh nise, hmanrua leh thil dangah harsatna an neih chuan inpuih tlan a tul tih a sawi. Kawng a chhiat hlimah a chhak lam ram neitute tan compensate a awm theih leh theih loh Lungleia CALA biak an ni a, an la rawn chhan loh avangin kawng chhak ko chu laih theih a la ni lo tih sawiin, Sub Hqrs YMA Hnahthial hnuaia Vigilance & Monitoring Committee-in kawng bal laia lirthei lian tlan theih loh tura structure an dah chu tha a tih thu leh tun dinhmunah highway pangngaiah LMV chauh kal tir a duh thu a sawi a ni.
Thurel dan chuan, ABCI-in tuna kawng pangngai hi uluk takin lirthei tlan theih turin a enkawl anga, by pass road laitu Mathiyan pawhin kawng hi tha thei ang berin an enkawl ang, tih a ni a. Hnahthiala truck neitute harsatna tawh, by pass chhuah dawna lirthei tang thin chu kawng enkawltu Mathiyan-in ni thum chhung hun pe a, ngaichang turin an ngen. Kawng minna lai by pass-a gabion wall siam ngai pawh ni thum chhunga thawh tan theih an inrin thu an sawi.
Bawrhsap chuan thutkhawma thurel bawhzui dan an ngaihven zui reng tur thu sawiin, NHIDCL, ABCI leh Mathiyan chu an insawi anga an awm loa, hotu lian zawk lama thlen a tul a ni pawhin a tul anga hma an lak zel tur thu a sawi bawk.
Hnahthiala NH-54 thawmthat leh laih meka hmalakna sawi
