Daily Newspaper

Hnahthialah CM-in lungphum phum

11

Chief minister Zoramthanga chuan Zirtawpni khan Hnahthiala District Horticulture Office thar hawngin, district office hmunpui – district secretariat dinna tur lungphum a phum bawk.

Hemi puala inkhawm buatsaihah chief minister chuan Hnahthial district tan hmasawnna ruhrel din belh zel a nih tur thu leh office thar hawn tak pawh tangkai taka chhawr a nih a beisei thu a sawi a. Mizoram tan ei leh bara intodelhna atan horticulture a pawimawh bakah economy thanna atan hlawk taka thawktu a nih chhoh zel theih tur thu a sawi.

District office hmunpui siam chungchangah office dawrtu tur mipuiten hmun hrang hranga veng hrang hranga kal kual ngailoin, hmun khata an dawr zung zung theih nan ruahmanna siam a nih thu te, hmun khatah department hrang hrang office-te chu a leng chin chin dahkhawm a nih tur thu a sawi. Hemi hian office thawktute karah thawhhona tha zawk a thlen ngei a rin thu a sawi bawk.

Chief minister chuan sawrkarin hmasawnna thlen tura a hmachhawpte chu hrileng vanga chak taka bawhzui theih a ni lo chungin, hmalak theihna lai laiah nasa taka hma lak a ni tih a sawi. “Hrileng a ziaawm zel a, nun pangngaia kan nun theih hunah chuan nasa taka hma lak belh a ni ang. Sawrkar chuan hmathlir tha tak nen, ngaihtuahna puitling tak hmangin ram pum tana tha turin theihtawp a chhuah zel a ni,” a ti.

South Tuipui bialtu MLA, minister Dr R. Lalthangliana chuan tuna an thil hawn chu district chhunga kuthnathawka eizawngte tan a tangkai hle dawn tih a sawi a. District tichangtlung tura department hrang hrangten Hnahthial district chhunga an hmachhawpte sawiin, Covid hrileng sawrkarin theih ang angin hna a thawk chho zelin hmasawnna hmuh tur hrang hrang a awm chho zel chu lawmawm a ti a. Hrileng awm lo phei se tun aia district office tam zawk a awm tawh a rinawm tih a sawi.

District thar pathuma district secretariat sakna atan cheng vaibelchhe 10 theuh dah a ni a. Hnahthial district office complex hi chhawng thum awm tura ruahman niin, meter 786.45 sq metre bial vela zau tur a ni.

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy