Youth Services department leh Mizo Zirlai Pawl tangdun buatsaih ‘Youth-20 Meet on Nationalism, Patriotism and Development’ chu district hrang hrangah neih zawm zel a ni a. Nilaini khan Hnahthialah neih niin, college leh higher secondary school zirlaite an tel.
He hun hmanpuitu minister Dr R Lalthangliana chuan nationalism chu hnam rilru put ringawt niloin, ram leh hnam tana pen chhuah a, a taka Zo nun zemawi nunpui a, chetchhuah pui a ni, tiin, Zofate zingah inpumkhatna a lian chho zel a, geographical boundary chuan Zohnahthlakte inunauna a daidang theilo a, thinlunga inkungkaihna leh a taka chetchhuahna chu ram leh hnam hmangaihna dik tak a ni, tiin a sawi. Mizoramin hma a sawn zelna’n leh hnam a boral lohna’n zirna ngaipawimawh sauh sauh turin zirlaite a fuih bawk.
Youth-20 Meet-ah hian MZP adviser Lalnuntawma Fanai chu speaker-a hman a ni a. Zohnahthlak hmun hrang hranga chengte rilru ah Mizo nationalism a lian chho zel chu ropui a tih thu sawiin, ram leh hnam hmangaihna, ram tana thahnemngaihna leh hmasawn duhna a lian chho zel tih a sawi. Zirlaite chu hnam inpumkhatna atan an pawimawh hle, tiin, Zoram mipui chu hmun hrang hranga awm Zohnahthlakte tan inpui nghaktu rilru puin khaw hrang hranga an unaute hmakhua ngai a, tuamhlawmtu ni turin a chah.
Hnahthialah Y-20 Meet hmang
