Health & family welfare minister Dr R Lalthangliana, South Tuipui AC bialtu ni bawk chuan, August ni 15, 2019 a\anga district anga a kal hnuah Hnahthial chuan hmasawnna nasa tak a hmu a; district-in a ken tel office tam tak hawn tawh niin district thar pathum zingah DC office building hawng hmasa ber a ni, a ti.
He thu hi minister chuan nimina Horeb conference hall-a Hnahthial District Village Council Association inkhawmpui a hmanpuinaah a sawi a. Hnahthial district-ah District Treasury Office, DVO, Horticulture Office, DUDO, DRDO, DCSO leh office dang tam tak hawn a ni ta chu ropui a tih thu sawi in, DIET te, Rawpuia Kendriya Vidyalaya Sangathan, zirlaiten a thlawn veka lehkha an zirna hmun tur te pawh ruahman a nih thu tarlangin hmasawnna lungphum pawimawh tak a ni, a ti.
Office la hawn loh langsar zual District Transport Office leh District Local Administrative Office te pawh hawn thuai a nih theih nan hmalak mek a ni, a ti bawk.
District hmasawnna tur ruahmanna awmte chu a phurawm hle tiin Tuipui D-a cheng nuai 9100 a lei dawh tur pawh thawh \an thuai a nih tur thu a sawi a. District-in a ken tel sub-division office hrang hrang pawh ruahman zel a ni dawn a ti bawk.
Minister chuan VC te chu an pawimawh hle tiin sawrkar kutke pawimawh tak an ni a; mipui vantlang nena inngheng hnai ber an ni tiin an harsatna leh an mamawh hretute chu VC an ni a, an hnathawh chu pawimawh hlein an mawhphurhna pawh a sang hle tiin,, rinawmna leh ram hmangaihna tak tak nen thawk chhunzawm zel tura chahin duhsakna a hlan nghal a ni.
He huna khualzahawm district bawrhsap Chuauhnuna pawhin thu sawiin, Village Council tih thumal chu India Danpuiah Panchayat tih vek a ni tawh a ti a. India sawrkar leh Mizoram Inremna thuthlung hmangin Article 371 G chuan Mizo dan hman mekte hman chhunzawm a phalsak tiin Village council Act pawh tun thlengin humhalh a nih phah chu lawmawm a ti hle tih a sawi bawk a ni.
Hnahthialin hma sawn nasa: Dr Thangtea
