Daily Newspaper

Hnam dang tawng thiam hi…

16

School education minister Lalchhandama Ralte chuan Hindi field-a Padma Shree dawngtute leh doctorate degree neite chawimawina hun nimina a hmanpuinaah, India ram inpumkhat nan Hindi thiam a pawimawh, tiin a sawi a. Mizoram sorkara thuneitu sang rualte leh officer te pawh phaia kal nikhuaa Hindi-a tawng hlei thei lo tam tak an awm tiin, Prachar Sabha chu nasa zawka hma la turin a fuih a.

India ram hi ‘multilingual country’ a ni a, ram pum huapa hman tur national language ang hi chu a awm chiah lo niin a lang a. Hetih lai hian Hindi leh English erawh hi chu, tawng tlanglawn ber a ni a. India rama hnam chi hrang hrangte hian inbiakpawh nana kan hman rim ber chu Hindi leh English hi a ni lo thei lo. A bikin Mizoram hi hnam hlang awmna state a nih bakah, a awmna hi India ramah pawh a hmawrfem, hnamdangte nena inchiahpiah lohna a nih avangin, hnam dang tawng thiam kawngah state dangte nen khaikhinin kan hnufual deuh niin a lang.

Northeast state danga awm kan hnampuite erawh hi chu, hnam dang nen an inchiahpiah avangin tawng chi hrang hrang hi an thiam zel zul a. State danga han kal nikhua hian, Mizoram mite hi hnamdang tawngah kan buai deuh tlangpui a, hei hi thenkhat chuan, hnam induh, mahni tawng chauh chawisang a, hnam dang tawng ngaisang lo leh thiam tum lo, ‘induh’ ang thawthangin min chhuah mek a ni.

Education minister-in a sawi, Mizoram chhunga sawrkar hnathawk officer lian tak tak, English bak tawng dang, entirnan, India rama tawng tualleng ber Hindi pawh thiam lote hian state pawn lamah buaina an tawk thin a tih hi thudik tak a ni.

India rama awm kan nih chuan, India rama tawng tualleng ber Hindi thiam hi chu tihmakmawh a ni a, hei hi sumdawnnaah a ni emaw, zirnaah a ni emaw, sawrkar thila indawrnaah a ni emaw, chak zawk leh fel zawka indawrna kalpui a nih theih nan a pawimawh hle. Khawi hmunah pawh awm ila, tawng inhriatpawh lohnaah chuan kan inthlahrui dui a, midang nen kan inpawh tak tak thei lo.

Mizoram Governor hna rawn chelh tawhte reng reng khan, tawng chungchanga Mizoram dinhmun hi an rawn vei deuh zel a. Mizoram Governor 12-na Nirbhay Sharma phei kha chuan, ‘ziak leh chhiar thiam kawngah Mizoramin hma hruai mah se, English leh Hindi thiam kawngah awmzia a nei lem lo, tiin a sawi hial a. ‘Mizo thalaite dâltu lian ber chu hnam dang tawng thiam tam loh a ni. Theihna sang tak nei, Mizo thalaite hian Mizo tawng bakah tawng dang thiam tam se, nasa takin Mizoram an tihma­sawn ang a, dinhmun sang zawkah an vawrh chho ngei ang’ tiin a lo sawi tawh nghe nghe a ni.

Mizote hi talent nei tha tak kan ni a, kan talent peipung tur chuan hnam dang nena indawr a pawimawh a, hnam dang nena indawr thei tura hnam dang tawng thiam tum lamah tan kan lak a pawimawh hle a ni.

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy