Hnam hrang 26-ten Manipur hi an venghim – CM thar
Yumnam Khemchand Singh-a chu Nilaini tlaia Manipur chief minister thar atana lak luh a nih hnu lawkah an state-a hnam chi 36 awmte chu an state venghimtute an ni vek tih a sawi.
Singh-a hi Thawhlehni tlaia BJP legislature party leader atana thlan a nih hnu leh an state-a President’s Rule hman mek hlih a nih hnu lawkah chief minister atan hian lak luh a ni a, Naga leh Kuki-Zo hnam atangin a deputy chief minister tur pakhat ve ve lak luh an ni bawk.
Sorkar thar lak luh a nih hma lawk hian nikum February thlaa an state-a President’s Rule pan chu hlih a ni tih union home ministry chuan a puang.
Singh-a lak luh inkhawm hi Imphal-a Lok Bhavan-ah neih niin Naga People’s Front (NPF) party mi, Mao bualtu MLA, Losi Dikho chu deputy chief minister atan lak luh a ni a. Kangpokpi bialtu, Kuki-Zo BJP MLA Nemcha Kipgen-i chu Delhi-a Manipur Bhavan-a awm hmun atangin video conferencing hmangin deputy chief minister atan lak luh a ni zui bawk.
Chief Minister Singh-a chuan, “Manipur-ah hian hnam 36 kan awm a, heng hnam 36-te hian an zavaiin Manipur hi an venghim a. Heng hmante rilru put hmang hian Manipur-ah muanna a thlen dawn a ni,” a ti.
Manipur-a hnam hrang hrangten a huho leh phur taka an tanhona chuan inpumkhatna leh inunauna a tichak dawn tih a sawi bawk.
“BJP hruaituten Manipur tihmasawn tura mawhphurhna lian tak min pe a, hnam tinte mamawh leh an chakkhai zawng zawng neih leh pek an ni dawn a ni,” a ti bawk.
Chief minister leh a deputy tur pahnih lak luh hnuah hian BJP MLA K Govindas leh NPP MLA Kh Loken te chu cabinet minister atan lak luh an ni zui.
Sorkar thar lak luh inkhawmah hian eptu MLA, chief minister hlui N Biren Singh, O Ibobi Singh leh R K Radhabinod te telin politician hlun tak tak te, police officer leh sorkar hnathawk lawk tak takte an tel.
Union home ministry-in Nilaini tlaia thu a chhuahah Manipur-a President’s Rule chu tiamchin awm lova hlih a nih thu a tarlang.
Kum 61 mi, Singh-a hi hruaitu langsar tak ni ngai lo mah se an state-a chi leh chi inkar buai lai zawng khan an party chhungah chuan an duh tlan nia sawi a ni a. An sorkar chiri lei, party pum suihkhawm leh khauh taka rorelna fawng chelh a ngaih lai tak bawkin mawhphurhna lian a chelh chu fiahna hautak a ni dawn niin a hriate chuan an sawi.
Manipur hi kum thum dawn phaizawl leh ram lailia cheng, Meitei leh tlangrama cheng, Kuki-Zo inkara buainain a tuam avanga sorkar pawh mumal thei ta lo kha an ni.
Kuki thenkhat hian an state atanga inlak hrana inrelbawlna hran neih an duh a. Sorkar thar a din leh hma lawk pawh khan pawl thenkhat chuan sorkarah an tel ve dawn loh thu an la sawi a. Sorkara Kuki MLA an tel pawhin an en dan a dan tur thu an sawi hial.
Kuki hruaitu, chief minister hmasa sawisel nasa tak, Paolienlal Haokip-a chuan sorkar thar siam tur puan hma lawk khan politic-a tih theih china an thil phutte tihhlawhtlin tuma ziaka thu dah a awm loh chuan Kuki-Zo mipuite chu legislative party leader lamah an tan dawn loh thu X-ah a la tang lang.
Meitei pawlte pawhin buaina avanga baihvaia awmte an awmna ngaia an kir fel hma loh chuan lehlam nena inbiak a theih loh tih an sawi ve bawk.
Manipur-ah hian May 3, 2023 khan Kuki-Zo leh Meitei inkarah buaina chhuak tanin nikum February 9 khan Biren-a chu chief minister atangin a bâng zui a. February 13-ah President’s Rule puan zui a ni ta a ni.
Hnam hnih intihbuaina avang hian mi 260 chuang thi awm tawhin mi sang tel in leh lo tlanchhiatsana baihvai an awm phah bawk a ni.
Hnam hrang 26-ten Manipur hi an venghim – CM thar
