Hnam lam intihsiaka pakhatna YMA Chanmari West Branch

Hnam lam intihsiaka pakhatna
YMA Chanmari West Branch
YMA branch-in hnam lam an intihsiaknaah Chanmari West Branch an thiam ber a, pahnihna chu Vaivakawn Branch an ni.
Art & Culture department leh Central YMA tangdun buatsaih Chief Minister’s Running Trophy vawi 13-na Hnam Lam Intihsiak chu Inrinni khan khar a ni a. Hmanpuitu chief minister Lalduhoma chuan hnamdangte laka hnamdang min nih tirtu chu kan zia, kan tawng, zai leh lam, kan nunphung leh kan tihdan hrang hrang an ni, tiin, “Chu chu Pathian min pek a ni. Mihring hi awmreng mah ila kan hnam zia a bo si chuan, hnam bo kan ni mai ang. Chuvangin kan tihdan tha tinreng hi kan chhawmnung zel tur a ni a, kan zahpui tur a ni lo,” a ti.
Kristianna in kan hnam zia tam tak min thlaksak tih chief minister hian a sawi a. Tunhma deuh chuan Mizo irawm chhuak hlate biak inah kan sa duh meuh loa, khuang lakluh takngial pawh kan remti loa, Mizo incheiin kan inchei lut ngam mang lo tih a sawi.
“Vawiinah erawh chu’ngte chu a lo bo ta tial tial a, kan Kristiannaah kan hnamzia a leng chho tial tial a. A nihna takah chuan seki leh tingtangte nena Pathian fak hi Pathian thu nen pawh a inrem thlap a, Kristianna leh kan culture hi rem takin a kaldun thei a ni. Khawvel huapin Kristianna hi thlir ila, hnamze mila Kristianna an kalpuina hmun apiangah kohhran a nghet a, member pawh an pung chak thin. Kan culture hian kan hnukah min man tlat a, kan ngaina theuh a ni. Kristianna nen inmil takin kalpui tlat ang u,” Lalduhoma hian a ti.
Art & Culture minister C Lalsawivunga pawhin hnam changkangten hmasawnna leh an hnamzia an kalkawp tir thiam a, hmasawnna ke pen nghet an nei thin tih a sawi. Kan Kristianna leh kan hnam ze thate keng chungin hma kan sawn tur a ni, tiin, chu chu hmasawnna dik a ni, tih a sawi a ni.
Kumin intihsiakah hian YMA Branch 42 chu Khuallam leh Cheraw ah an inel a. A pumpuia pakhatna YMA Chanmari West Branch niin, pahnihna YMA Vaivakawn Branch an ni.
Cheraw bikah hian pakhatna YMA Chanmari West Branch, pahnihna YMA Lamka Branch YMA (Manipur), pathumna YMA Ramthar Branch an ni a. Khuallamah pakhatna YMA Vaivakawn Branch, pahnihna YMA Chanmari West Branch, pathumna YMA Pawlrang Branch an ni.