Daily Newspaper

HNAM PASALTHATE CHU!

17

(Sipai pual)

-Zoremi Hmar Zote

Nipui boruak lum uap churh mai
vawng dâi tura fûr ruahtui tam zual a reh a, leimin avanga nùnau mai ni lo, chhûngpuipa thlenga lairil râl muang lo reng renga kan awm thin hun a liam hunah leh, mipui mimir hrim hrim pawhin kan unau ten chhiat an tâwk palh ang e ti a, thin phu dèp dépa kan awm hun hi a liam hunah chuan, favang kâwl eng no ruih mai leh hnâr thawi dam em em tu Vangpui boruak nêlawm zetin min châwiin, kan Zoram boruak chu a nuam leh pek hle dawn mai!

Chhungkua, nu ber eirawngbawl mawng vawm bâ ang maia phe dàwr dáwr te, nau nawi zual zun khum kekawr thlâk nawk nawk laia pa ber office/hna bang lo haw rawn ‘heihaa’ dap mai ri te hi a mawi a, chhungkaw member zinga tê ber, kal thei tawk tawk pawhin a pa lo haw chu lo lawmin, a pan ve tai tai thin a nih hi maw… Hahdam hman lék lo va fa ten an lo bawh huam huam, nu berin, “I pa kha a hah a nia…chawlhtir ve teh un” a lo ti chêl chúl te hi, a man a va to em!

Heti anga chhungkaw tam zawkin lung muanga hun leh ni kan hman lai hian, tu emaw pasal, tu emaw bialpa, tu emaw nau pài lâi pa ni ve tho si te chuan kei leh nang, kan ram tan dâi an vêl a, ram palailêngah riah rûn remin, thosi leh zan nungcha leh chiapchâte hrâm ri chauh lo chu an khawhar hnemtu an nei lo va, kan ram tan an tuar mek a ni. Nang leh keiin tuk tin kan pasal te Office tur pêr deuh duaih a, “Bye awww” kan tih leh, kum khata vawi hnih khat chauh inhmu thei, inhmangaihte in mangtha thâwm hi chu a inthlâu vìng vèng ngawt hian ka ring a ni.

Ni e, Chawlhni tuka hlim taka Biak in pan te, hlim taka fate infiam thlir leh nupui te thingpui lum in te chu kan tan thil pangngai ni mahse, an tan chuan thil thlakhlelhawm tawp khawk, zan tina an suangtuahna luahtu a ni fo va, râl ramah ram tana nun hlan huama feh chhuak hnam pasalthate an ni tih hre reng mahse, an rilru tam ber chu an lawina rûn, an hmangaih ten a luah hnem ber leh rûn sumtual, an hmangaihte tualchàina hi a nih ka ring ngawt mai! Pa chang meuh pawhin lunglêngin an kùrpui fo hian ka ring thin!

Ka pasal, ka fapa leh ka nuta chunga thleng tura ka duh hauh loh tawng palh mai thei dinhmuna ding mek, kan sipaite hi an lo va hlu em aw ka ti thin. Hlawh ngawr ngawr thu-ah chuti em ema hnemhnànpui bik loh tur, lu zawrh châng awm fo akâra hmangaihte nena inthen sek mai ngai bawk nen chuan, a manhla chiamin ka hre lo; mahse pasaltha an ni miau a!

An nupui/bialnu te hlei hlei hi an va chhel em! Thihna lova hmeithai, pa nei chunga pa lova chhungkaw enkawl leh zirna kawnga fate kaihhruai te, Huan pal hung atanga Gas bur put te, khawvel sual laka fate venhim hna nen, an mawhphurhna san zia leh an ko rih zia hi vawikhat tal i lo ngaihtuah ve chhin tawh em? Hei vang hian a lawm, sipai nupui chu hmeichhe pangngai aia an rorum a, harsatna hmachhawn kawnga teh an dâwl viau reng ni!

Enge an tan tih theih kan neih ve le?! Kan pasal/bialpa te-ah han chan chhin ila…lo lang hmasa ber chu an tana tawngtai hi a ni ta mai awm e! |awngka lama sipai lu bâwk tih thlâkzen te, rilru nei lo leh mâwl bik ang maia chhaih fo te hi sim a tha khawp mai. Kan society-a ka thil duh loh ber ber zingah, a ka kaw nazawngin nuthlawi kan hmuh dân, kan fiam duh dân leh chhaih dân te, sipai lu mûm ti a, fiamthu thawh nan tak kan hmang thin hi a tel. Nuthlawi bik hi kan la chhiar turah ngai ila.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy