Tharbawihi Colney
Mizote hi hnamah kan chiang lo niin ka hre thin. Kan hnam puan, ni bîk leh hun bîk nei vek, a sin/veng/ khim thei chin awm hrang thliah, kût ni vangthlaa kan hman, lal leh hnamchawm thleng thliar hrang thei, kan Mizo puan heti tak maia kan han suasam thin hi chu pawi ka ti.
Term hmasa/Sawrkar hmasa khan tawlhlohpuan kha Chennai-a Mizo thi rawn phur chhotu Vaipa te kha an lo bahtir tawh. (chumi lo pawh chu awmin ka hria, ka chiang vek lo) Khami tum pawh khan ka thîkthu a chhiain ka lo dem hle tawh a ni.
Tun tumah hian kan CM chuan Vaipa te inneih thilpek tuam mawi nan thangchhuah diar a hmang ve leh a, a dawngtute hi hrilh fiah hmasak zet loh phei chuan puan tial satliah ve maiah an ngai thei ang. Lo hrilh fiah hle pawh ni se, an tan eng nge a tangkaina leh a hlut viau chhan tur ni ang le? Sari ni ta se, an hlut viau zâwk ang em? Nge ni a, kan CM hian khawvel mite hmuhah kan hnam puan hlu hi a tilang ve duh hrim hrim? Hetih lai hian Opposition Party-te mit a lo timim ve hle bawk a. Party ang zawng phei chuan tu mah indem thei an awmin ka hre lo. Mahse, kei chuan ka dem tlat che u.
TAWLHLOHPUAN:-
Tawlhlohpuan hi a mawi em em a. Puan dumah a sen leh engin khêl zâwn, mawng zâwn leh hma lamah intial thlain, a rawng thlâk a fuhin kan pi pute mit finzia a lang thei.
A PAWIMAWHNA
Mizote, kan pi pute kha indo thin an ni a, mahni khaw thenawmte pawh do zêl mai an ni. Chutianga an indo chânga hnehna chang, tlangval huaisen, râl hmatâwngte kha TAWLHLOHPUAN an lo bàn thin a ni. Hetianga kan pi pute atanga kan hnam ro, kan puan hi keini’n kan roh loh chuan hnam dangin min rohsak dawn lo a ni.
THANGCHHUAH DIAR. Thangchhuah diar pawh hi tawlhlohpuan ang bawka puan duma a êng leh sena tial a ni a. A dung leh vâng zâwnga tial a ni. Diar a nih angin a puan hi a lian lo hle.
A PAWIMAWHNA
Hmanlai kan pi pute inelna leh an nih tum ber zinga mi chu THANGCHHUAH hi a ni. Thangchhuah tur hian ram lam leh in lamah thang a chhuah theih ve ve a, ram lam emaw, in lam emawa thangchhuah nu leh pate kha lal tluk deuh thawthângin an ropui a, an zah a, chawimawi nan THANGCHHUAH DIAR hi an khimtir thin a, Mizote tan a hluin a pawimawh êm êm a ni.
Tunlaiah chuan puan tahtute’n tahin mipa hoin kawrah te hâin sikul leh office thenkhat leh ni bîk kan neihah te an ha thin a, a mawi hle. Hetih lai hian kan hman dan thenkhat hi chuan kan puan ro leh hlu tak hi kan tikhaw lo zo niin ka hria.
Aw le, kan ram leh hnam chhana, humhalh nan hian eng hi nge pawimawh ber ang le? Ramri, tawng, kan hnam thuam, kan nunphung, ruihhlo, sakhua… Hêngte hi pakhat mah hlamchhiah tur awm lovin ngaihthah theih an ni lo vek a ni. Pakhat kan lâk vunga, a dang kan hlamchhiah si chuan kan hnam hian tlakchham a nei tho tho dâwn.
Chuvangin, a vaiah khian tan kan la vek thei lo a nih pawhin, kan ban phâk tâwk theuh leh kan theihna chin chinah hma i la zêl ang u. Kâ maiin ram leh hnam hi humhalh lovin, a tak takin i humhalh ang u.