Hnam rilru pu Haaland

Hnam rilru pu Haaland
International game 48 khela goal 55 khawl tling tawh chunga Norway ram tana goal khung hnem ber ni mek Manchester City striker Erling Haaland chuan tunhnai khan hmanlaia an hnam chet velna leh chanchin inziahna lehkhabu (Viking book) hlu tak chu an khua Bryne-a library pakhat tan a ‘donate’ a, he lehkhabu hi pound 100,000 zet man a ni!
Norway ram pawisa kroner (Norwegian crown) an tih phei chuan he lekhabu hi maktaduai 1.3 man daih niin, nikum December thlaa a pa nena an lei a ni a, Norway rama lehkhabu zawrh runpuia lehkhabu leina man to ber record thar siama an lei ngat a ni nghe nghe!
He lehkhabu hi kum zabi 13-na laia historian Snorri Sturluson ziah, kum 1594 daih tawha an chhut kha niin, a hlu vet vet hle.
A chhung thu hi hun laihawl, medieval period an tih laia Viking lalpa leh lalnute chanchin bakah loneitute leh indomite chanchin inziahna a ni.
He lehkhabu an tihchhuahah tuna Haaland pafain an lei hi a copy awmchhun a ni tawh a, mi nazawng chhiar phak loh khawpa hlu a nih tawh avangin hnam rilru pu tlat Norway forward hian an khaw mipui a duh apiang chhiar theih turin library tan a pe ta a ni.
Kan hriat angin Viking an tihte chu Scandinavian an tih mai, hnam leh hmelhmang, tawng leh khawsakphung thlenga inzul vek, tunlaia Europe hmar lam ram pathum – Norway, Sweden leh Denmark kan tih taka cheng hmasate sawina niin, Scandinavian lawng mi, sumdawng leh indomite chu Viking an tihte chu an ni.
Viking-te chanchin inziahna lehkhabu hlui tak mai chu Haaland pafain man to takin an lei a, an ram leh hnam, an chipuite tan an hlan ta a; thangthar zawkte’n an hmanlai chanchin chiang zawka an hriat theih duhna vang a ni.
Kum 25 mi Haaland hi Leeds United tana a pa Alf-Inge inkhelh laiin Leeds khawpuiah a piang a, Norway rama Bryne khuaah a seilian thung.
Bryne hi Norway ramah pawh an ram mawi zualna lam, khualzin pawhin an tlawh nasatna an ram khawthlang lama awm niin, an khaw langsar pakhat Stavanger an tih atanga chhim lam km 30 vela hlaa awm, Jaeren district-a Time municipality huam chhunga mi a ni.
City striker palian Haaland hian match 29-ah goal 22 nei tling leh tawhin tun season Premier League-ah top scorer a ni leh mek a; nikum khan Europe atanga 2026 World Cup khel tur zawnna European qualifiers-ah goal 16 thun tlingin top scorer a ni tawh bawk a; kum 1998 hnu lama a vawi khatna atan World Cup khel turin Norway a tlinpui bawk.