Mizo Bawngsa Zuar Association chuan hnam dang, dan lova bawngsa zuarte chu tun thla May ni 13 hnu lama bawngsa zuar tawh lo turin an ngen a. Bawng talha eizawng Mizo zingah hnamdang thurualpuia lo hum tlat te, mahni hming hawhtira sumdawnna kalpui engemawzat an awm tih sawiin, Mizo, mahni hming hawhtirte leh hnam dang thurualpuitute zawng zawng pawh titawp turin an ngen nghal a. An hmalaknate thlawp sak turin veng tin YMA, Local Council leh mipuite an sawm nghal bawk.
Tunhma kum tam tak kalta atang khan hnam hming leh nihna hralha hnamdang sumdawnpui hi buaipui a lo ni tawh thin a. A bikin Aizawlah chuan zirlai pawl leh YMA lamin an buaipui hle a. Hetiang thil hi dan kalh a ni ti reng chung siin, dan kalha sumdawnna kalpuitute chunga action lakna hi hmuh tur a tam lo hle lawi si a ni awm e.
Tunhma kan mi hmasa sumdawngte khan vai ramah dawr an lo siam ve tawh thin a, mahse an hlawkpui thei lova, a tawpah an bansan nge nge thin niin sawi a ni. Hnam dang zinga dawr an hawn khan, eng tin mah tharum thawhna emaw, tawngkam dengkhawng hmangin emaw an rum thaih thin pawh a ni lo, an rama Mizo dawr lo awm ve kha tha takin an en liam mai a, an kal pel a, anmahni hnampuite an dawr a, Mizo dawr kha chu an kal kan reng mai a ni. Chutiang karah chuan luhlul chhuahin kum engemawzat dawr han hawng ve bawk mah se, a hlawk miau loh avangin an insaseng leh mai thin a ni awm e.
Hnamdangte hi hnam rilru put kawngah kan khan lo hle a ni.
Mizoramah pawh dawr an rawn hawng ve a, anmahni mi leh sate dawr turin Mizo dawr tam tak kal kanin hla tak tak an kal peih.
Chutih laiin, keini chuan a ruk a ralin hnam dangte hnenah kan hnam hming kan hralh a, mahni kan inhralh a ni. Tunhmaa sal inlei hun lai ang mai khan, tunah chuan mahni kan inzuar a ni deuh ber e. Kan rama Vai dawr te hi, keimahni Mizo ten kan ram ngeiah kan nghah sak tawh a ni. Hnam rilru put chu khawi lam, hnam kan hralh a ni ber; a zahthlak hle a ni. Tunah Bawng bawng talha eizawng zingah hnamdangte thurualpui an lo awm leh ta zel a. Thil dangah pawh hetiang hi a tam ang.
Hnam rilru put kawngah hian harh tharna kan mamawh ta hle mai a, hnam dangte a hring ahrana tharum hmanga nawr buan buan emaw, kut thlak emaw lam a ni lo. ILP hum fur chunga min chim pil nasat tawh dante hi en ila, thalaite kan harh thar loh chuan, dawhthei taka kan ke bula kun anga langte hian thawklehkhatah min lehthal phut thei tih hi kan hriat a ngai. Hnam rilru put kawngah hian harh tharna ‘revival’ kan mamawh a ni.
Hnam rilru put…
