Mizo hnam sipai hluite chuan chief minister ni mek chu remna thuthlung hmang tangkai ngam lo leh ti bawrhbangtuah puhin, CM ni zui zel tlakah an ngai lo tih an sawi.
Ex-Mizo National Front Association leh Peace Accord MNF Returnees Association Coordination Committee chuan, Mizoram-in remna thuthlung a neih, a rah kan seng mek chu nunna tam tak leh thisena an hlawh chhuah a ni tih sawiin, chief minister Pu Lalduhoma’n sawi nep leh sawi dal phet a tum reng mai chu thinrimthlak an ti a, remna thuthlung hmang thiam lo leh hmang ngam lo a nih chuan thuneihna a chan mek chu midang kutah hlan mai se tih chu an duhdan a ni tih an sawi.
Pu Lalduhoma hian remna thuthlung, Memorandum of Settlement (MoS) chu a hming dik pawha sawi duh loin, ‘Memorandum of Agreement’ tih leh ‘Memorandum of Understanding’ tia a sawi bakah ‘Mizoram sawrkar leh India in an sign pawh a ni loa, MNF party leh India sawrkarin an sign a ni a, Mizoram leh India inremna a ni loa, Mizorama party pakhat leh Home ministry inremna a ni a, a ropui teh chiam lo,” tiin thudik lo a sawizui tih a sawi a ni.
Hei mai hi duh tawk loin, remna thuthlung hmanga nemngheh ‘Inner Line Regulation’ pawh an duh hun huna sawrkar laipuiin a paih theih, derthawng tak angin a sawi tih sawi chhawngin, Mizoram leh India sawrkar Inremna thuthlung thubul chang 8-naah, Inner Line Regulations hi Mizoram sawrkar rawn lo chuan siam danglam emaw paih emaw theih a ni loang, tih a chuan thu an sawi.
Pu Lalduhoma chu Mizoram leh hnam himna khawih thilah chuan huaisen taka mipui hmaa ding tura beisei a nih laiin, pawn lam atanga nawrna pawh awm si loa, ram leh hnam inhumhimna kulh pawimawh tak ‘Sawrkar laipuiin a duh chuan min thiahsak thei’ tih a sawi chu vanduaithlak an tih thu Coordination Committee chairman Vanlalbiaa chuan sawiin, “Tun hi a vawikhat sawina a ni loa, an party office-ah pawh ‘Central mit timim zawng leh an paih chak zawng hian awm lo ila, India ram zirlaite khuan Vai danna dan an neih khi paih a hun tawh, tiin kawng zawh ta luai luai mai se a khirh khawp ang, hetia awm hle hle hi a tha ber,’ tiin a lo sawi tawh a. Hnam sipaiten thisen leh nunna tam tak senga kan ram leh hnam humhimna tur kan lo hlawh chhuah ve a ti derthawngtu leh a sawi neptua a tang zawk zel mai hian kan rilru a ti na a, engamah hmaa central sawrkar laka dawl zawra zawr nghal ringawt, remna thuthlung hmang tangkai ngam lotu leh tibawrhbangtu hi CM dinhmuna ding zel tlakah kan ngai lo,” a ti.
Hnam sipai hluiten CM ni tlakah ngai lo
