Keini ang hnam tlem zawkte tan chuan hnam thinlung hi kan dam chhuahna awmchhun a ni tih MNF president Zoramthanga chuan a sawi.September 20 kha MNF party chuan ‘Martar-te Ni’ ah an hmang a. AizawlaMNF office Mizo Hnam Runa hmannaah Zoramthanga chuan, Pathianin keini hnam tlemte ram min pe a, hnam leh lal thuthlung nen kan nationalism chu kum 1966-ah a lo tho a. Kum 20 chhung hnam thinlung thisena baptis-in a awm a. A tawpah kum 1986-ah inremna kan lo nei ta, tia sawiin, “He hnam thinlung hi a rei tulh tulh a, hnam tlem zawk tan chuan a hlu tulh tulh. Dam chhuahna awmchhun a ni. Kan chhehvel en ila, nationalism tel lo chuan hnam engzat nge buai tawh? Kan hnam martar-te thisen hlutna hi a rei tulh tulh anga, kan hre tulh tulh dawn,” a ti.
Zoram chu martar-te thisena baptis a ni, tiin, “Kan hnam hi a ral tep thin a, mah se, tling lo takin hnam thuthlung ‘Pathian leh kan ram tan’ tih kengtuten harasatna karah an vuan tlat zel a, a rawn tho chhuak leh thin. MNF chu tuar tura din, harsatna su tura din a ni. Chutiang chuan ram an enkawlin a puitling thin,” a ti.
Tunlai politics boruak sawiin MNF president chuan, MNF chu chhia zawng zawng bel an ni a. Congress, PC leh Union sawrkar pawh chhe vek anga chhuah a; thangtharte rilruah dik lo taka zirtirna kalpui a, mi fuihpawrh thin an awm tih a sawi. “Amaherawhchu, a sut turin Pathianin ‘thil thleng’ a rawn awmtir zel. Keini chiah kan tha, kalphung thar nen an tih laiin, candidate tur an lo infawm hnemin an tiam tam lutuk a, an buai ta vek a. An hotute chu an chief minister kal vut vut tawh a. A lo thlen hma pawh hian kan zo lo nghal a ni,” a ti.
Pawnlama kan unauten kan hnam nationalism an rawn enin, tha an ti a, MNF chu sawrkar leh turin an duh vek a; an sawrkar leh loh chuan an tan a pawi dawn an ti niin Zoramthanga hian a sawi. “Lak tlak loh khawpa min chhuahtute hian nationalism hi min chhuhsak thei lo. Bangladesh, Burma, Tripura, Manipur atangin martar-te thisena puan sufaite an rawn en a, MNF a sawrkar loh hi keini aiin an hlau zawk,” a ti.
Hnam thinlung hi kan dam chhuahna awmchhun a ni – Zoramthanga
