India danpui siamthatnaah hnam tlem zawk leh sakhaw zuitu tlem zawkte chimral theihna tur hawi zawngin Bill pass ala awm ngai lo tih BJP Mizoram thupuangtu Lalremsangi Fanai chuan a sawi.
BJP Mizoram State thupuangtu hian hun rei tak atanga buaipui hlawh India ram hmeichhiate tana 33% (1/3) seat zuahna tur, Women Reservation Bill, Parliament rorelna sang (Lok Sabha leh Rajya Sabha) a lungrual leh hneh taka pawm a ni chu lawmawm a tih thu a sawi a. Parliament building thar chhunga rorelna hmasa ber leh Bill pass hmasa ber, ruling leh opposition party pawh sawi loa, member zawng zawng lungrualna hnuaia pass a ni chuan he bill pawimawh zia leh pass a tul zia a tichiang hle tih a sawi.
Prime minister Modi kaihhruaina hnuaia khawvela ram hrang hrang economy hausa tehna kawnga pangana dinhmun India-in a hauh mek tih sawiin, India ram chu hruaitute lungrualna, hnam leh sakhaw inthliarna awm lo ‘India Secular’ zia a lantir tih a sawi a ni.
Village Council leh Municipalities rorelnaa women seat reservation felfai taka thliarhran a nih hnuah State Legislative Assembly leh Parliament-a hmeichhiate dinhmun chawisan a, mawhphurhna pek a ni leh tur chu India ram ropuina tisang lehzualtu a nih a rin thu Lalremsangi Fanai hian a sawi.
“Constitution siam tantirh atanga vawi za chuang siamthat (amend) tawhah hnam tlem emaw sakhaw zuitu tlem tana chimral theihna tur hawi zawnga Bill pass a la awm ngai lo. Tu pawhin hnam leh sakhua, culture leh tradition a nunpui thei a, sakhua pawh a duhzawng a be thei tih hriatchian a tul,” a ti.
Hnam tlem leh sakhaw zuitu tlem chimral theihna Bill la pass lo – BJP thupuangtu
