Daily Newspaper

Hnathawh kawr hatute

10

Editorial…..

Covid-19 hrileng karah Village Council leh Local Council member thlanna chu zawhfel a ni ta a. Kan hriat vek angin, kuminah hrileng avangin nunphung a khaihlak vek a, a hun pangngaiah kan inthlang thei lova, hma lam hun hriat a nih loh avangin, tuna hetia inthlanna neih fel a ni ta hi a lawmawm hle.

Khawtlang thatna leh hmasawnna tura mipuiin kan aiawha thawk tur mi kan thlan chhuahte hian, ‘min thlang rawh u, khawtlang hmasawnna turin chumi khami chu kan ti ang’ tiin inthlan hmain mipui hnenah an inzuar thin a; ‘hnathawh kawr min haktir rawh u’ tih chu campaign auhla tlanglawn tak a ni bawk.

Village Council leh khawpuia Local Council tinte hian, mipui hnena an intiam anga, hnathawh kawr ha chunga hna thawh tak takna rilru hi pu vekin, hna hi thawk tak tak theuh se chuan, khaw tinin hmasawnna thar engemaw tal hi kumtin an nei vek ang a, chumi infawk khawm chuan Mizoram hmasawnna lian tak a thlen ngeiin a rinawm. Tunhma atang tawhin, VC inthlan apiangin ‘khawtlang hmasawnna tur policy leh manifesto’ tawktarh a lo ni tawh thin a, mahse tun thlenga kan dinhmun han en hian, ‘hnathawh kawr min haktir rawh u’ titute hian hnathawh kawr hi an lo ha duh tak tak lo em ni ang, tihturin hmasawnna hmel hi lang chhuak chak lo hle niin a lang.

Ram inrelbawlnaa a bulthut (grassroot level) pawimawh em em village council hian an khawih theih chinah tal hian tihtak meuhva hna an thawh phawt chuan, term khat, chu chu kum nga, chhung hian khawtlang hmasawnna thar engemaw ber hi chu an sual chhuak thei tih a chiang a ni.

Hetih lai hian, party politics kan kalpui dan hi inenfiahnan kan hman a pawimawh tawh hle. Democracy ramah mipuiin aiawha hnathawk tur kan thlang chhuak a, a tua te pawh thlanchhuah an nih chuan khawtlang hmasawnna tur hna an thawk thei tura ngaih a ni. Chutih laiin, ruling leh ruling lo inthliarna awm thin anga thil a kal thin hi kan bansan a hun ta hle niin a lang. Khawtlang roreltute ‘ruling party’ an nih loh mai avanga hmasawnna hna thila inhrek anga thil a kal a nih chuan, chu chu thil dik lo hulhual, mipui tawrhna leh, ram leh hnam thuanawpna thlentu a nih avangin ‘sual’ a tling a, chu chu mipui lam pawhin kan do tlat a tul.

Eng pawh ni se, covid-19 hrileng kara buaina leh harsatna lutuk thleng lova inthlan zawhfel theih a ni ta hi a lawmawm a. Hnathawh kawr thar hatute pawhin, ram leh hnam hmasawnna tura mipui aiawha hnathawk tur an nih inhre chunga thahnemngai taka thawk theuh turin inhlan thar leh mawlh teh se.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy