Daily Newspaper

Hnathawh vil ngai hi…

10

Tun lai hian sawrkarin Mizoram hmun hrang hrangah kawngpui siam hna a thawk mek a. Hetih lai hian Central YMA chuan kum 2018-a Mizoram Public Works Department nena kawngpui siam chungchanga thawhhona thuthlung an lo ziah tawh bawhzuia mahni huam chhung theuhva kawngpui siamte tha taka thawh a nih theih nan hnathawhte vil turin Sub-Hqrs, Group leh Branch YMA tin te a hriattir a. Mizoramin kawngpui tha a neih ngei theih nana theihtawp chhuah tlang turin a ngen a ni.

Mizoramin kawngpui a neih that theih loh thinzia hi tumah inhrilhfiah hran ngai kan awm chuang awm lo e. Zep theih a ni lo va, a langtlang vek a; chumi a nih avanga YMA lam pawh mangang an ni. Kawngpui siam lama mawhphurtu department leh NGO te thawhhona thuthlung siam hial a ngai hi, thil tha zawk duha thiltih mah ni se, sawrkar lam tana tlawmthlak tak ang pawhin a ngaih theih ang a. A lehlamah chuan, MPWD lam tan pawh, thawktu indaihloh kara hetianga hnathawh vilpuitu an nei hi a lawmawm lamah a ngaih theih bawk awm e.
Mizoramah hian hmasawnna hnathawh tam zawk hi chu belhchian dawl lo leh daih rei lo tak a ni deuh zel ti ila, kan uar lutuk lo maithei. Abikin kawngpui phei hi chu, ‘fur khat pawh daih lo’ tih hi tawngkam tlanglawn tak a ni tawh. Lirtheia eizawngte mangangin hnatlanga mahni insengsova kawngpui siamthat hna an thawh hi a tam tawh hle. Hetiang thil thlengah hian, sawrkar tana mualphona lian tak a nih laiin, hnatlanga thawkte thingpui lumna tur sum tlem azawng theh chhuah bak hi sawrkar lam atanga hmalak zuina hmuh tur a awm mang ngai lo bawk.
Tuna hetia Central YMA lamin kawngpui tha kan neih theih nana hma a la hi a lawmawm hle a, hetih lai hian sawrkar lam pawhin NGO lam vilpui ngaia awm hi sawrkar mualphona a ni tih hria a, NGO tihtura dah liam mai lova, hmasawnna hnathawh reng reng ram leh hnam ro tling tura hma a lak thar hi a pawimawh hle.
Kum a thar ang a, ruahtui a tla leh ang a, chhuanlamah ‘ruahtui’ lamrik a ngai leh mai dawn a. Tun atanga kawngpui siam hna sawrkarin a thawk hi a lawmawm hle a, furpui a lo thlen hmaa a tam thei ang ber thawk thei tura thapui chhuah hun lai tak a ni. Kumthar lamah chuan kawngpui tha zawk, daih rei zawk nei thei turin sawrkar, NGO leh mipuiten theihtawp i chhuah tlang ila, hmasawnna hnathawh invilpui ngai tawh lo turin sawrkar pawh hian tan han la bawk sela.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy