Hnu chhuichhuahnaa che tha
Lunglei Police an chawimawi
October 2025-a Facebook-a Wildlife dan bawhchhiatna video post chungchanga a titu chhuichhuah kawngah Lunglei Police Station-in rang taka hma an lak avangin Divisional Forest Officer (DFO) Thenzawl leh Working Plan Officer (South) tangdun chuan Thawhlehni khan Lunglei P/S hnenah chawimawina thuziak leh sumfai an hlan.
He hun hi Lunglei additional SP K Beihmotaosa chuan a hmanpui a. Chawimawina hi WPO (South) Solai Azyu chuan Lunglei P/S officer -in- charge inspector VL Sawma kutah hlanin, social media hman danah fimkhur tur leh ramngaw leh nungcha humhalhna dan tha taka zawm turin mipui a ngen nghal a ni.
He pawikhawihna thlenna hi Thenzawl Forest Division huamchhung a ni a. Wildlife Dan bawhchhetute chet dan video, social media-a tarlan an hmuh atangin Environment, Forests & Climate Change department hotute chuan hma la nghalin, an ngenna angin Lunglei Police hian pawikhawihtute hi rang takin an chhui chhuak a, dan anga hrem an ni.
Hnu chhuichhuahnaa che tha Lunglei Police an chawimawi
