Bengaluru khawpuia All India Inter SAI Hockey Women’s Championship khelh zawh takah Mizoram hmeichhe hockey team pakhat zawk chu final-ah an vanduai a, runners up trophy an lungawipui mai a ngai.
Inrinni final-ah hian Mizoram leh Madikeri (Karnataka) chu final-ah intumin, a tlawm zawkah Mizo tleirawlte an tang a; champion zo ta lo mah se he tournament-a mimal chawimawina ngaihhlut hlawh ber best player lawmman chu Mizo team innghahna lian C. Lalnunsiami’n a dawng.
He tournament-ah hian Thenzawla girls hockey academy (SAI Thenzawl) atangin tem pahnih an chhuak a, an senior team zawkin final an lut a, an junior team zawkin an hneh loh hi final match-a an ute hneh loh Karnataka team tho kha an ni.
South India lama hockey tournament-ah hian SAI Thenzawl chuan an naute tuaihriamna atan team pahnih hi an tir a; junior team zawk hian karliamta Nilaini khan sihnih faiin Kerala team an hneh a, he match-a goal hnih lut hi Durtlang naupang K. Vanlalpeki (Apektei) tihluh ve ve niin, Apektei hi player of the match-a thlan a ni nghe nghe.
Mizoram team pahnih hi Bengaluru atangin an lo haw mek a ni.
Hockey-ah Mizoram an champion zo lo
