Hockey ngaina khua Hnahthialah umpire intuaihriam
AstroTurf ngaiin an rum…
Tunkar Thawhlehni khan Hnahthial District Hockey Association (HDHA) buatsaih hockey umpire-te tana dan leh hrai inzirtirna ‘Workshop on Umpiring Clinic’ chu Hnahthial MJA Press Club-ah Bawrhsap Rita Lalnunmawii Pachuauin a hawng a, Aizawl District Hockey Association president Lalrampari’n kalkhawmte hnenah zirtirna a pe.
Training hi February ni 26 aTanga February ni 28 thleng nitin zing dar 6-a Tan Thin tura ruahman niin, hetih chhung hian HDHA chuan naupang kum 10-14 inkar tan SAI, Thenzawla ‘trial’ hmachhawn turte tan free training a neihpui nghal a, training petu hi HDHA president Laldingluaia Sailo a ni.
Thawhlehnia Hnahthiala umpiring clinic hawnna hun kaihruaitu hi HDHA secretary C. Lalremsanga niin, HDHA president bakah MJA member-te’n a hawnna hun hi an hmanpui.
Workshop hawngtu Bawrhsap chuan Hnahthial district chu Mizoram puma champion thei tur khawpa hockey lama thiamna nei Tha an nih thu leh he district chhungah hian talent a awm tih chu a taka an lantir chian tawh thu sawi chungin player Tha tak tak chherchhuah tur pawh Thahnem tak la inthukru an awm ngei a rin thu sawi.
Rita Lalnunmawii chuan thiamna inphumru haichhuah chu thil pawimawh tak a nih thu sawi chungin lehkha zirna lam ringawt ni lo, sports-ah pawh eizawnna a awm thu sawiin, infiamna lama Thangtharte theihna a taka phochhuak thei tur chuan theihtawpa puih an mamawh thu a sawi a; hockey-ah pawh a tui mite’n thiamna tak tak an neih theihna’n academy-a luhtir a Tul thu a sawilang tel.
He umpiring clinic-a zirtirna petu resource person Lalrampari chuan he huna training chhimtute chu zirtirna uluk taka ngaithla turin a chah a, Hnahthial tan mai ni lo, Mizoram pumpui tan umpire an nih thu sawi chungin Tan bik nei loin an rorelnaah dikna kengkawh tlat tura a duh thu a sawi.
Football uar khua, state leh ram pum huap pawha footballer Tha leh hlawhtling lo chhuahna Hnahthial khua leh he district hi Mizoram chhim lam mai pawh ni lo Mizoram pum huap pawha hockey ngaina, uar leh thiam khua an ni tel bawk.
India leh Mizoramah pawh hockey game a thih Thup lai pawha hockey tournament nung tak buatsaih Tang Tang thei an ni a; tunhnai Uttarakhand-a National Games zawh fel takah pawh khan Mizoram hockey team-a player thawh hnem ber district niin, player panga ngawt an thawh!
He district aTang hian Mizo hmeichhiate zinga hockey Olympian hmasaber
H. Lalruatfeli a lo chhuak tawh a; ani hi tunhnai National Games-a Mizo team chhunga tawnhriat ngah player niin, Railways tana khel mek a ni.
International player Ruatfeli bakah hian Hnahthial district aTangin junior international player pahnih PC Lalrinpuii leh Lalrindiki an la awm a; Rinpuii hi Women’s League club Shrachi Rarh Bengal Tigers tan a khel mek a; Lalrindik hi Railways player a ni thung.
Anni pathum bakah hian state player dang pahnih Lalneihpuii (NCOE Delhi) leh
Merabi Lalruatfeli (NCOE Delhi) an la nei a; mipa lamah NCOE Bangalore leh Income Tax, Ahmedabad tana khel thei F. Zoremsanga an la kawl cheu bawk!
HDHA secretary C. Lalremsanga chuan Mizoram hmun danga national game ‘hockey’ a thih Thup lai leh tournament mumal pawh an siam theih tawh loh laiin Hnahthialah chuan hlung taka hockey inelna kalpui a nih Thin thu sawiin, chu chuan naupangte thinlungah hockey game ngainatna a tuh a, Mizoram district te ber ni chunga National Games-a player thawh hnem ber an nih theih chhan pawh he district chhunga ‘hockey spirit’ nun reng vang hi nia a ngaih thu Post Sport a hrilh.
Hnahthial district hockey hruaitu Lalremsanga hian chuti taka hockey game ngaina, hmangaih leh vawngnung khua/district an nihna vang chauh pawhin hockey khelmual Tha (astroturf) neih phu an intih thu a sawi a; tunlaiah hockey khelmual Tha nei lo tan phaitual leh international kawtkai thlengin thlensan tak tak a harsat thu a tarlang tel.
HDHA hotu chuan, “National Games-ah pawh khan Mizoram team-ah player kan thawh hnem ber a; kan district-ah hian talent a awm Tha a, chu mi haihchhuah kawnga puihna kan mamawh tluk zetin ground Tha kan mamawhna a sang a, khelmual Tha hi nei ngat ila chuan Mizoram leh India tan player chhenfakawm tam zawk kan thehchhuak ngei ngei ang tih hi kei leh ka thawhpuite hian kan chiang a ni.
“Hockey field puitlinga siam tur khelmual pawh kan nei a, kan sawrkar hian international standard khelmual min dinsak turin kan ngen a, kan beiseina hi min tihhlawhtlinsak a nih ngat chuan Mizoram leh India tan tha ba kan sut ve ang,” a ti!
Hnahthial District Hockey Association hruaitute
President : Laldingluaia Sailo
Vice President : H. Lalthanzuala
Secretary : C. Lalremsanga
Asst. Secetary : K. Lalremruati
Treasurer : Lalbeiseii Sailo
Fin. Secretary : H. Vanlalsiami