Bhubaneswar khawpuia Kalinga Stadium-ah Pathianni khan mipa hockey world cup final khelh niin, tunhnai kum nga chhung teh meuh khawvel mipa hockey thunun nghet burtu Belgium barakhaihin Germany kutah FIH men’s hockey World Cup trophy a lut a; tournament thlengtu India chu Argentina nen pakuana an ni pha chauh thung!
Khelmual khat mipui pungkhawm hmaa final khel team pahnih hi hun pangngaiah 3-3-in an inhnehtawk zet a, sudden-death hmanga thelh niin, rin kai lo zawk German hoin defending champion lakah 5-4 hnehna nen a vawithumna atan FIH Hockey men’s World Cup trophy an hawn.
Hun pangngaiah Florent van Aubel Florent (10th minute), Tanguy Cosyns (11th) leh Tom Boon (59th)-te’n Belgium tan an khung a; sihnih faia an hnufual hnu hian Germany erlet tan Niklas Wellen (29th), Gonzalo Peillat (41st) leh captain Mats Grambusch (48th)-te’n an vawlut ve leh a, penalty shoot-out hmanga chak zawk zawnnaah Germany an vannei ta zawk a ni.
Tun kha he tournament-a sihnih faia hnufual tawh chunga German-ho chaklet vawithumna niin, chumiin a entir chiang tak chu rilru lama an paukhauhzia hi a ni ang.
A hmain quarter-final lama England an hmachhawn tumin sihnih an chhuah hnuah an tholeh a; semi-final pakhat zawkah pawh chutiang bawk chuan Australia lakah hnehna an chang.
Ti hian, Australia leh Netherlands hnung zuiin Germany hian World Cup title pathum an la tling ve ta chiah a ni.
Tunhma lama an lo champion tawhna chu kum 2002 leh 2006 tournment kha niin, vawili champion thei awmchhun chu Pakistan chiah an la ni.
Germany hi kum 1982 leh 2010 khan runners-up niin, kum 2014-ah parukna, kum 2018-ah pangana an lo hauh tawh.
Tuntum final khelh hma ni chiah khan Germany head coach Andre Henning chuan tlarhnung ven lama an insawr-bing tur thu sawi mah se minute hnih chhungin goal hnih an chhuah nghal thawt a, mahse, beidawng loin an khel chhun-zawm a, champion laia lakah hnehna an sualchhuak.
Kumin World Cup-ah hian team 16 chhuakin, world cup vawi 15 awm tawha goal luh hnem ber tum a ni a, match tina goal 5.66 zel lut ang niin, tournament chhunga match 44 khelhah goal 249 a lut tling.
Chuti zat zinga goal 143 chu field goal niin, 94 chu penalty corner atanga lut leh goal 12 chu penalty stroke atanga lut a ni.
New Delhi-a 2010 World Cup nghah a nih tum khan team 12 chhuakah game 38 atangin goal 199 a lut a, match tina goal 5.24 zel lut ang a ni.
Tournament chhunga goal khung hnember Australian player Jeremy Hayward chuan goal kua ngah tlingin, best player atana Germany star Niklas Wellen thlan a ni a; best young player chu South Africa beiseina Mustapha Cassiem niin, Belgium goal-veng Vincent Vanasch kutah best goalkeeper lawmman hlan a ni ve thung.
An trophy kawl lai humhim zo ta lo Belgium-in fair play award an dawng ve bawk.