Social Welfare, Women & Child Development minister Lalrinpuii chuan Thawhlehni khan Zemabawk Lungbial-a Sirius leh Cresent House bakah Laipuitlanga awm – Rephidim Home, Sunshine Home, Mizoram State Child Protection Society office te tlawhin home-a awm leh thawktute nen an inkawm.
Humsual dai naupangte chu nun bul tan tha leh tura chahin, nun bul tan tha turin tlai luat a awm lo tih minister hian a hrilh a. Home naupangte chu an nu leh pate eng dinhmunah pawh ding se, an hmusit tur a ni lo, tiin, naupang vanneiin sawrkar enkawlna a thlawna an dawng chu hmang tangkai a, an nun siamthatna kawnga chhawr tangkai turin a chah.
Sirius Home hi naupang mipa kum 18 hnuailam, ruihhlo lama harsatna nei enkawlna hmun niin, tunah hian enkawl lai 9 an awm a; kum 2015 atang khan naupang 179 an lo enkawl tawh. Cresent House hi hmeichhe naupang kum 18 tlinglo awmna niin, tunah hian naupang 20 an enkawl mek. Kum 2018 atang khan hmeichhe naupang 52 enkawl an ni tawh. Sirius leh Cresent House-ah hian Home superintendent hoin thawktu 17 ve ve an awm a ni.
Rephidim Home-ah hian naupang rualban lo 25 enkawl lai mek an nei a; superintendent hoin thawktu 17 an awm. He home-ah hian naupang rualban lo nu leh pa enkawltu tur nei tha lo te chauh dah niin, Mizorama district tin atanga dahkhawmna a ni.
Minister hian Rephidim Home, Sirius Home leh Cresent House-te hnenah hian tanpuina sumfai a hlan a ni.
Sunshine Society for Children Laipuitlang hi specialised adoption agency niin, kum 2008-a din a ni a. Tun thlengin naupang, ram chhunga adoption atana an pek tawh 140 a ni a; India ram pawnah naupang 29 adoption atan an pe tawh bawk. Tunah naupang pahnih adopt theih tur an awm mek a, superintendent hoin thawktu 11 an awm a ni.
Minister hian Child Helpline (1098) Centre bakah State Adoption Resource Agency (SARA) State Project Manager office a tlawh bakah Child Guidance Centre leh After Care (kum 18 chunglam) mi 19 awmna a tlawh nghal a. Home-a naupangte hi home educator-ten an zirtir bakah school-ah nitin an kal thin a ni.
Home leh adoption office tlawh
