Siaha-a Independence Day lawmna hmanpuia kal Home minister K Sapdanga chuan Ningani zing khan Siaha-a Mara Autonomous District Council office a tlawh.
Minister hi MADC chief executive member M Laikaw leh a thawhpuiten lo dawngsawngin, elected office holder ho leh MADC-a head of department chin nen an inkawm a ni.
CEM chuan Pu K Sapdanga chu Mizoram state minister zinga MADC office tlawhtu hmasaber leh a awmchhun a la ni tih sawiin lawmthu a lo hrilh a. Siaha district mamawh hrang hrang a thlen nghal.
District Council Court-a police ASI leh constable a ngheta dahsak a, Siaha district-a police indaih lohna enpui tur leh District Jail building leh a dang bakah staff quarter sakthat sak tur leh, police quarters a hlui tawh hlawm avanga sakthat sak turin a lo thlen.
Siaha district-a Urban Development & Poverty Alleviation department chu MADC kuta hlan turin CEM hian UD&PA minister ni bawk K Sapdanga hi a ngen a ni.
MADC executive member K Chhuabei chuan Siaha district mipuiin an hman ber, District Playground Siaha Vaihpi chu mipui intawhkhawmna atan hman tlak a nih theih nan hma laksak turin minister hi a lo ngen bawk.
Minister chuan a theih ang anga enpui a tum thu a sawi a ni.
Home minister-in MADC pisa tlawh
