Home minister-in MPL leh MEC tlawh

Home minister-in MPL leh MEC tlawh
Lungleia kal Home minister K Sapdanga chuan Inrinni khan Mizoram Polytechnic Lunglei leh Mizoram Engineering College Pukpui a tlawh,
Mizoram Polytechnic Lunglei (MPL) a tlawhnaah hian Higher & Technical Education director Laltanpuia hoin MPL principal Er Lalnuntluanga leh thawktuten an lo dawngsawng a. MPL principal chuan ram luah man chungchanga court thubuai vanga kumin June 27-a MPL building engemawzat kalh chu sawrkar hmalaknain August 12 khan hawn a ni leh tawh a, class pawh pangngai taka kalpui a ni tawh, tiin, sawrkarin a ngaihsaknaah an lawm takzet tih a sawi.
Minister chuan MPL chu engineering lama mithiam tak tak leh Mizoram innghahna thahnem tak chher chhuaktu, Mizorama technical institution upa ber a nih angin a hlu hle tih a sawi a. Tluang taka zirna chhunzawm leh theih a ni chu lawmawm a tih thu sawiin, tha taka MPL zirna kalpui a nih theih nan sawrkarin theihtawp a chhuah a, harsatna leh mamawh la awm – building thuamthat leh thawktu indaih lohna phuhrukna tur pawh a tul anga ngaihtuah zel a ni dawn tih a sawi a ni.
Minister K Sapdanga hian Pukpuia Mizoram Engineering College (MEC) dinhmun a enfiah bakah official-te nen zirna tan thei tura hma an lak dan leh hmabak awm an sawiho a. H&TE director Laltanpuia sawi danin, MEC hi Rashtriya Uchchatar Shiksha Abhiyan (RUSA) hnuaia sum hmuh vaibelchhe 26 sengin 2016 April 22-a sak tan a ni a, 2018 November 16-a zawh a ni. 2019 February 3 khan Prime minister-in ral atangin a hawng a, harsatna hrang hrang vangin zirna la tan theih a la ni lo. Building sak zawh tawh thawmthat ngai leh a panna kawng siamthat leh mamawh hrang hrang atan Mizoram sawrkarin cheng vbch. 25.41 a dah a, chief minister-in kum 2026- 2027 session atanga zirna tan hman tura a tih angin, department chuan tan hman ngei tumin hma a la a ni.
MEC chu engineering zirna tur leh Mizoram hmasawnna atana zirna in pawimawh tak tur a nih avangin chief minister duh ang ngeia 2026-2027 session-a tan hman a nih theihnan tha leh chak taka hna thawk turin department hotute leh thawmthat ngai leh buaipuia mawhphurtute chu minister hian a chah a. Mamawh an neih pawh sawrkara thlen zung zung turin a chah.
MEC-ah hian building ding lai 8 – academic block, administrative block, workshop/ laboratory, library, boys hostel, girls hostel, cafeteria leh students common room a awm a. Sawrkarin a thawm thatna tur cheng vbch. 25.41 a ruahman chu a panna kawng siamna atan nuai 750 (MPWD kutah), tui pekna leh dah khawlna atan nuai 249.44 (PHED), eng pekna leh transformer bunna atan nuai 106.36 (P&ED) leh H&TE kutah campus tihchangtlunna, hmanrua leh bungraw hrang hrang leina atan nuai 1435.39 dah a ni.