Daily Newspaper

Hong Kong media tycoon Jimmy Lai Jail tantir

9

Hong Kong media tycoon leh pro-democracy supporter Jimmy Lai chu bumna kalpuia puh niin nakum April thlaa a chungthu ngaihtuah a nih hma chuan lung ina khung tura tih a ni.

Court chuan amah bail tumna chu hnawlin a company hmun te chu dan kalha thiltih nan a hmang tia puh a ni a. Jimmy Lai man a nih hma hian pro-democracy activists pathumte pawh lung ina khung an ni bawk.

Hong Kong sorkar chuan pro-democracy activist te vai hna tan thar lehin heng zingah hian media mite an tel nual a, Hong Kong-in security law a hman thar hmanga man an ni hlawm.

Lai hi kumin kum tir lam khan National Security law hmanga man tawh tho niin bail-a chhuah a ni zui thung a. China chuan dan thar te hi Hong Kong-a ngelnghehna a awm theih nana tihmakmawh a nih thu sawiin sawiseltute chuan pro-democracy activists te hmeh mih tumna an ti thung.

Hetihlai hian Hong Kong pro-democracy legislator Ted Hui chuan Denmark-a zinnaah Hong Kong chhuahsana a tlanchhiat tur thu a sawi bawk.

Kum 73-a upa Jimmy Lai chu nilaini zan khan a media company Next Digital senior executive pahnih te nen man an ni a.

Lai hi Next Digital dintu niin Apple Daily chhuahtute an ni a, Hong Kong-a tabloid chhiar hlawh ber niin Hong Kong thuneitute leh mainland Chinese leadership sawiselna chhuah nasa an ni.

An pathum hian court-ah hruai niin an company headquarter chu dan kalha thiltih nana hmangah puh an ni a. An headquarter chu dan kalha midang luah hawhtirah puh an ni.

Fraud charge te hi National Security Law hnuaia ngaihtuah a ni lo thung niin Apple Daily chuan a tarlang a. Mahse, a ngaihtuahtu judge hi Hong Kong leader Carrie Lam in a thlanchhuah bik niin sawi a ni thung.

Next Digital senior executive pahnih te chu bail phalsak an ni a, Jimmy Lai erawh ‘tlanbo a tum’ an rin chhuanlamin bail an phalsak lo nia sawi a ni bawk.

Tu nge Jimmy Lai?
Hong Kong pro-democracy thlawptu langsar ber zinga mi niin Lai hian rosum $ 1 billion vel a nei anga ngaih niin a tirah clothing industry a bul tanin a hnuah media luhchilhin Next Digital a din zui ta a ni.

Local media-te chuan Beijing hlauhna an nei tial tiala ngaih niin China tan chuan Lai hi hling ang mai niin a media hmanga Chinese leadership a sawiselnate chu an duh lo hle a ni.

Hong Kong-a cheng tam tak te tan erawh ‘hero’ni thungin mainland China chuan ‘phatsantu’ angah an ngai thung a, Chinese national security tiderthawng theitu a an ngaih a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy