Hozier-a’n a vawi khat nan Billboard Hot 100 chart-ah No.1 kai thei hla a nei ta a, hetihrual hian Sabrina Carpenter pawhin a vawi khat nan he chart-a top 10 kai thei hla a nei ve ta bawk. Hozier hla hot ‘Too Sweet’ chu Hot 100 chart No.2 atangin No.1 a kai ta a, Sabrina Carpenter hla ‘Espresso’ pawh No.7-ah a debut.
Billboard Hot 100 (singles) chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
Irish singer-songwriter Hozier hian 2014-15 khan a hla hit ‘Take Me to Church’ chu chart No.2 kaipuiin, he hla hi rimawi khawvelin a hmelhriat tanna a ni a, mahse, he hla bak hi chu chart top 10-a lang thei hla dang a nei ta lo vang vang a, tunah ‘Too Sweet’ hi a rawn No.1 pui ve leh ta a ni.
‘Too Sweet’ hian kar khat chhungin US-ah stream maktaduai 35.6 leh sales 6,000 neiin, radio airplay-ah pawh ngaithlatu maktaduai 14.1 a nei thei a, hei hi chart-ah a No.1 pui ta a ni. He hla hi Hot 100 chart history-a chart No.1 kai thei hla 1,169-na a ni.
Hot 100 chart-ah Irish singer te an No.1 khât khawp mai a, Hozier hi a pangana a ni a, 1990-a Sinead O’Connor hla hit ‘Nothing Compares 2 U’ hnua Irish singer he chart-a No.1 kai leh thei hmasa ber a ni a, Irish mipa zaithiamah phei chuan kum 50 chuang kaltaa Gilbert O’Sullivan hla ‘Alone Again (Naturally)’ hnua No.1 leh thei hmasa ber a ni.
Future, Metro Boomin leh Kendrick Lamar te hla hit ‘Like That’ chu kar thum a No.1 hnuah No.2-ah a tawlh ta a, Benson Boone ‘Beautiful Things’ pawh No.3-ah bawk la awmin, chart No.1 hlui Teddy Swims ‘Lose Control’ pawh No.4-ah bawk a la awm a, chart No.1 hlui bawk Beyonce ‘Texas Hold ‘Em’ cu No.6 atangin No.5 a kai thar ve leh ta a, chart No.1 hlui tho Jack Harlow ‘Lovin on Me’ chu No.7 atangin No.6-ah a insawn ve leh hret bawk.
Tunlai zaithiam chawrno mek Sabrina Carpenter hla thar ‘Espresso’ chu stream maktaduai 19.8 leh sales 4000 neiin, radio airplay-ah ngaithlatu maktaduai 5.1 a nei bawk a, hei hio chart No.7-ah a debut pui a, he chart top 10-a a lan vawi khatna a ni. Sabrina Carpenter hian Taylor Swift ‘The Eras Tour’-ah show vawi 30-ah performance a neih sak a, hei hian rimawi khawvelah a tilar lehzual a, kumin Coacella festival-ah a perform leh bawk.
Chart No.1 hlui Ariana Grande ‘We Can’t Be Friends (Wait for Your Love)’ chu No.8-ah bawk awm lehin, Noah Kahan ‘Stick Season’ chu No.10 atangin No.9-ah a insawn a, chat top 10 atanga chhuak tawh SZA ‘Saturn’ chu No.15 atangin No.10 a kai thar ve leh ta bawk.
Hot 100 chart-ah ‘Too Sweet’ a thlum ber
![](https://theaizawlpost.org/wp-content/uploads/Clipboard01-703.jpg)