India ram puma dan inangkhat Uniform Civil Code hman tuma hmalakna kal mek dodalin nimin Session-ah House Member-ten lungrual takin official resolution an passed a. He resolution hi ram leh hnam hnuk khawih thil a nih avangin House Member-te hi “Kawi kawm thin ang thap” in an tangrual a ni.
Home minister Lalchamliana’n a put luh resolution hi, India rama Uniform Civil Code hman tuma hmalaknate House-in lungrual taka a dodal thu a ni. (That this House unanimously resolves to oppose any step taken or proposed to be taken for enactment of Uniform Civil Code in India).
He dan hian a tum ber chu, hnam hrang hrang leh sakhaw hrang hrang mahni puala tih dan leh kalphung heng — inneih leh inthen a ni emaw, rokhawm leh thurochhiah chungchang a ni emaw, chhungkaw inenkawl dan te, culture leh customary law etc. dah bo vek a, hnam leh sakhua pawh thliar lova inhrut rual a, ram puma dan pakhat ‘Uniform Civil Code’ hman tumna a ni.
He UCC chungchangah hian nikum December thla tir khan Rajya Sabha-ah chuan private member’s Bill lutin, opposition lamin nasa taka an dodalna karah a tlang a, Lok Sabha lamin an lo pawm leh chuan India ram Danpui zingah seng luh a ni dawn tihna a ni ta a. Hemi chungchangah hian Union Law Minister chuan UCC ngaihtuah chungchangah hian sawrkar laipui chuan engmah ruahmanna a la neih loh thu leh, 22nd Law Commission lam chhui chiantir phawt a nih tur thu parliament-ah a lo sawi tawh a. Chutih laiin 21st Law Commission khan, UCC chu tun dinhmunah hman a tulna a hriat loh thu, draft report a lo hnutchhiah a; hei hi 22nd Law Commission chuan a en zui ve leh dawn a; tun leh tunah chuan UCC hi ngaihtuah rum rum theih a la ni rih lo tihna a ni.
All India Muslim Personal Law Board pawhin February 6 khan an duh loh thu resolution an lo siam hnan tawh bawk a. Oppostion party lam pawhin he dan hian constitutional freedom a kalh tiin tanfung an siam a, UCC hi hman a nih vaih chuan ram inpumkhatna hi a kehchhe vek dawn a ni, an ti bawk.
Eng pawh ni se, he dan hi ngaihtuah mai theih dinhmunah a ding mek a, parliament-a sawiho theih tura a luh phawt chuan ban tam zawk na na na chuan an phar tling thei mai dawn tih a lang a, tun atanga duhlohna thawm lo tihrik rin hi thil tangkai tak a nih a rinawm a; northeast state dang, he UCC duhlotute nena joint resolution siam tura hmalak hial pawh a tangkaiin a rinawm a ni.
House-ah: Kawi-kawm thin ang \hapin …
![](https://theaizawlpost.org/wp-content/uploads/tap_logo-min-large.jpg)