Daily Newspaper

House-in mi paruk sun

33

Mizoram Legislative Assembly 8-na thutkhawm vawi 6-na chu Thawhlehni atang khan neih tan a ni a, Session hnuhnung ber leh tun Session inkara legislator hlui chatuan ram pan ta, mi paruk an sun.

Chief minister, House leader ni bawk Zoramthanga chuan heng an sun turte chanchin hi a chhiarchhuak a. August 31 tlaia thi, Indian National Congress hruaitu hlun leh sawrkar laipuia nihna pawimawh hrang hrang lo chelh tawh, India President hlui Pranab Mukherjee (84); Congress party ticket-a Lunglei South constituency atanga MLA-a kum 1989-a thlantlin, kumin March 7-a thi F Sapa (82); kumin March 30-a thi, MPC ticket-a Lunglei South constituency atanga MLA-a thlantlin tawh, J Lawmzuala (75); Mizoram MP leh Assembly speaker hlui, minister hlui ni bawk, kumin April 80-a thi Hiphei (82); Assembly speaker hlui leh minister hlui, kumin July 1-a thi Rokamlova (79); minister hlui F Lawmkima (79) te an ni.

House leader chuan an mi sunte chu ram pum leh House-in a chan an ni tih sawiin, “Kan ui takzet a ni,” a ti.

Speaker Lalrinliana Sailo remtihna leh sawmna angin opposition-a legislature party leader pahnih – Lalduhoma leh Zodintluanga bakah member dang – R Lalzirliana, Dr BD Chakma, KT Rokhaw, Lawmawma Tochhawng leh Vanlalhlana ten uina thu an sawi.

Praban Mukherjee:
A ni hian a politics zinkawng chu kum 1969 khan Indian National Congress-a lutin a tan a, hemi kum July hian Rajya Sabha member-a thlan a ni. Kum 1975, 1981, 1993 leh 1999 ah te thlan nawn a ni bawk. Kum 1973-ah Union Deputy Minister of Industrial Development ah ruat a ni a, 1979-ah Rajya Sabha-a INC deputy leader niin, 1980-ah house leader-a ruat zui a ni. Kum 1982-1984 inkarah Union Finance minister atan ruat a ni.

INC buaina avangin 1986-ah Rashtriya Samajwadi Congress a din a, kum thum hnuah inremna siamin INC nen an inzawm leh. 1991-ah Indian Planning Commission-a deputy chairman atan ruat a ni a. 1995-1996 ah External Affairs minister a ni a; 1998-1999 ah All India Congress Committee general secretary-ah thlantlin a ni. 1985-ah West Bengal Congress president atan ruat a ni a, he dinhmun hi kum 2000-ah luah nawnin kum 2010 thleng a chelh zui a ni.

Kum 2004-ah Jangipur constituency West Bengal atangin Lok Sabha member-ah thlantlin a ni a, Lok Sabha leader nihna a chelh zui a ni. Kum 2004-2006 chhung Defense minister a ni a; 2006-2009 chhung External Affairs minister a ni a, 2009-2012 chhung Finance minister a ni leh bawk.

Kum 2012-2017 chhung khan India President a ni a. President atana thlan a nih hnu ah active politics atangin a chawl zui ta a ni.

F Sapa:
Kum 1960-ah Mizo Union party a zawm a, hemi hnua Mizo Union leh Congress party inzawm hnuah Congress party-ah hian a awm zui a ni. Lunglei District Congress Committee-ah president leh treasurer a ni tawh a, 1989-a MLA inthlanpuiah Congress party ticket-in Lunglei South bial atangin MLA-a thlantlin a ni a, a term chhung hian deputy govt. chief whip a nih bakah Lunglei High Power Committee vice chairman a ni tawh bawk.

J Lawmzuala:
Kum 1994 atangin politics a luhchilh tan a, 1998 MLA inthlanpuiah MPC ticket-in Lunglei South bial atangin thlantlin a ni. A term chhung hian Mizoram KVI Board chairman a ni.

Hiphei:
Kum 1963-ah Lakher Region – Mara Freedom Party dintu zingah telin, vice president atan thlan a ni a, 1963-1969 ah Pawi-Lakher Region Council member-ah thlan tlin a ni.

Mizoram UT a nih laiin, Tuipang constituency atangin MLA atan a zawnin vawi 4 thlantlin a ni a; 1972 leh 1974 ah te independent-a tlingin, 1979-ah Janata Party, 1984-ah Congress party ticket-in a tling bawk. 1972 hian Assembly deputy speaker hmasa ber atan thlan a ni a, 1979-ah hian opposition deputy leader a ni. 1984-ah minister of state a ni.

Mizoram state a nih hnu in Congress party ticket-in Tuipiang bial atang bawk hian MLA-a thlan a ni a, 1987 leh 1989 inthlanah te a tling nawn leh. Palak bial atangin 2013-ah thlan tlin leh a ni. 1989-ah hian Assembly speaker-a thlan a ni a, speaker a nih mek lai July 1990-ah Rajya Sabha MP atan thlan a ni a, 1996-ah Rajya Sabha member-ah hian thlan nawn leh a ni.

2013-2018 chhung khan Mizoram Assembly speaker-a thlan a ni a, state politic lama a hmel a inlan loh lai, 2012 kum khan Mara Autonomous District Council-ah MDC atan thlantlin niin, Council chairman a ni.

Rokamlova:
Kum 1984-ah Congress (I) party a zawm a, hemi kum veka MLA inthlanpuiah Congress (I) ticket hian Aizawl East constituency atangin thlantlin a ni a, minister-a dah a ni. 1986 June 30 zana India sawrkar leh MNF inremna thuthlung ziahnaah khan a hmunah a tel ve a ni.

1987 MLA inthlanpuiah Congress (I) ticket bawk hian Aizawl East constituency atang tho in a tling leh a, 1989-a inthlanpuiah pawh a bial ngai atang hian a vawi thumna atan MLA-a thlan a ni. Cabinet minister-ah awmin July 1990-ah Assembly speaker atan thlan a ni.

F Lawmkima:
Kum 1993-a MLA inthlanpuiah Suangpuilawn bial atangin independent-in a tling a, Congress party nen thawk hoin minister of state a ni.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy