In hmun lo ram theh kawngah sawrkar a fimkhur tawh thu leh house site plot neihnaah ‘green area’ dah tawh tura tih a nih thu Land Revenue & Settlement minister Lalruatkima chuan a sawi.
Tunhnaia Vaivakawn leh Hunthar inrina laia lei hnuai che nawn lehin chenna in a tihchhiatte chu Thawhtanni zing khan Aizawl West-II bialtu MLA, minister Lalruatkima hian a tlawh a, khawtlang hruaitute nen hmalak dan tur an en ho.
Lei tawlh avanga harsatna hi kum tam tak kalta atanga intan tawh a nih thu bialtu MLA hian a sawi a. Tunah hian chhungkaw 19 in an chenna in chhuahsanin, building engemawzat thiah a ni tawh a. Building pathum dang thiat leh turin sawrkarin thupek a chhuah niin a sawi. Khawtlang hruaitute nen an sawi ho hnu ah, order a awm tawh chuan a tul anga Village Disaster Management lamin hma an lak zui tur thu a sawi a ni. Kumin kumtir lam khan building pali chu thiah a lo ni tawh bawk.
Dawrpui Vengthar atanga Zarkawt pan chhohna kawng awmsa tihzauh dan tur pawh bialtu MLA ho hian a hmunah an enfiah a; ram neitute dil belha kawng tihzauh a nih theihnan, UD&PA department atangin a siam hna thawh thuai tura ruahmanna peihfel a nih tawh thu a sawi a ni.
Vantlang kawng zauh chungchangah sawrkarin harsatna a tawh nasat thu sawiin Land Revenue minister hian a sawi a. “In hmun lo ram theh kawngah sawrkar hi kan fimkhur tawh khawp mai a. House site plot neihna apiangah ‘green area’ dah tawh turin kan ti a; vantlang kawnga zingzum lai han teh mai thin pawh teh tawh loin, kawng kual zingzum lai a awm a nih pawhin meter 4-a zau chin teh tawh miah loh turin kan ti a; tuma ram niloin vantlang ram ni tawh se tiin ruahmanna kan siam a ni,” a ti. Kawngpui hauh leh zah hi kan tu leh fate, Zoram tan a ni tih hriaa tute pawhin vantlang kawng zah hram turin a ngen nghal bawk.
(THE AIZAWL POST – Tualchhung)
Full>> ePaper Subscribe
