Houthi-in hma lam pan, nasa zawkin Saudi kap zel

Houthi-in hma lam pan, nasa zawkin Saudi kap zel
Yemen-a Iran-in a thlawp Houthi-te chuan tha tharin Saudi Arabia an beih chhunzawm a, Yemen khawthlang lama Red Sea hrulah huang an zauh zel bawk niin Yemeni ​thuneituten an sawi a. Riyadh chuan engtin nge hma lam an pan zel hi lo chhan let tur tiin ngaihtuahna an seng mek.
Hetih lai hian Gulf Arab ramten Iran nena inbiak an tum chu sawn hlat rih a ni a, Middle East buaina chuan zau zawk a kan kai leh khawvel tuialhthei inpekna a buai zel hlauhna a hring mek.
Houthi-te hian Thawhtanni khan missile leh drone thahnem takin Saudi Arabia chhim lama Khamis Mushait an bei a. Yemen beia Saudi-in thlawhna atanga an chhan let theih loh nan thlawhna dahna (hangar), radar system, tlankawng leh ralthuam dahna te an bitum.
Saudi thuneitute chuan chhim lam khawpui pathumah emergency alert tihchhuah a ni tel tih an sawi a. Civil mi 13 hliam tuar an awm niin Saudi kaihhruai Yemen-a tangrualte chuan an sawi.
Houthi-te hian tun hnaia hma an sanw hle a, Red Sea hnara Perim Island an la tawh a, Ningania Saudi Arabia khawchhak lama pipeline chu beiin khar a nih phah a, tuialhthei thawn chhuah pawh a buai phah a. Riyadh chuan pipeline beihnaah hian Iranian-ten an puih Iraq-a hel pawlte an ringhlel.
Saudi Arabia hian kum 1980 chhovah khan khatih laia Iran-Iraq indo avanga him lova ngaiin Strait of Hormuz hel nan Gulf atanga Red Sea thleng, km 1,200-a thui pipeline a siam a ni.
Sumdawngte chuan Saudi pipeline ​khar reng a nih chuan khawvel puma tuialhthei phurh kual 4% vel a nghawng dawn a, strait danchah a ni mek bawk si a, thil a khirh lehzual thei niin an sawi a. Hetih lai hian Riyadh chuan pipeline hi hawn leh thuai an tum tih engmah an la sawi lo.
Houthi-te chhang letin Saudi leh Yemeni air force-ten an hmunte an bei a, Red Sea-a lawng chawlhna, Mocha pawh an bei a; mahse, Houthi hi Red Sea khawthlang vau kam pumah an insawh nghet tawh niin Yemen-a khawvelin a pawm sorkar aiawh chuan a sawi.
“Houthi hian nawrna an tawng nasa a, hei hi nasa zawka Saudi beihah an tlak ve thung a, missile leh drone an chelek ta vak a ni,” tiin Yemeni thuneitu pakhat chuan a sawi.
Yemen-a buaina thar awm hi U. President Donald Trump-a tan chona thar a tling.
Reuters-in mi pathum hnena thu a dawn a tar lanah chuan Washington hian Saudi-in ngen hle mah se hnu chhuina atanga fiahna chiang tak a awm loh chuan sipai chakna hmanga tel ve a tum lo va. Trump-a hian kartawpah khan Saudi crown prince a bia a, Houthi-te pawhin Washington hi biain buainaah inrawlh lo turin an ti bawk.
Saudi sorkar chuan Crown Prince Mohammed bin Salman-a chuan Thawhtanni khan US regional commander Admiral Brad Cooper-a chu Jeddah-ah a bia niin a tar lang.
Saudi Arabia hi tangrual ramten kum 2015 atanga Houthi an beihna kaihruaitu a ni a; mahse, tun hnaiah inkahhai an puan avangin kum eng emaw ti chen chu buaina an nei lo va. Tun thla tir atanga irh chhuak lehin Houthi-te hian khawvelin a pawm sorkar sipaite an bei nasa hle hle a ni.
Hetih lai hian Oman-in Thawhtannia Iran leh Gulf ramten Strait of Hormuz hawn dan tur inbiak a thlen tur chu thulh a ni a. Oman chuan sawn hlat ringawt niin a sawi a, Iran pawhin Saudi Arabia ngenna avanga sawn niin a sawi bawk.
Khawvela tui kawng pawimawh ber zinga mi hi February 28-a US leh ​Israel tang dunin Iran an beih atang khan Tehran chuan kharin an thu lo chuan lawng kaltlang a phal lo.
A hmaa khawvela tuialhthei leh boruakalhthei phurh 20% zet kalna kawng a pin tak avang hian khawvel pumah inpek kualna a buai a, a man pawh a to phah chak hle a ni.