Yemen-a khawvelin a pawm sorkar chuan an thuhnuaia awm thlawhna tumhmun lian ber chu Houthi-ten ballistic missile leh drone hmangin an bei niin an sawi a, Saudi Arabia pawhin an khawpui, Riyadh hmar lamah missile an kap thla ve bawk tih an sawi.
Nilainia transport ministry-in thuchhuah a siamah Houthi-te hian tumhmuna tlankawng leh passenger terminal chu ballistic missile pahnih leh drone eng emaw zat hmangin an kap niin tar lan a ni.
“Missile pakhat zawk hi Cairo atanga Yemeni thlawhna a tum hma lawkin tlankawng bulah a tla,” an ti a. “A tum tur hi thulhtir niin passenger-te him nan Jeddah, Saudi Arabia-ah tumtir a ni,” a ti.
Ministry chuan terminal pawh tihruah niin tarmac-a thlawhna pahnih pawh hun sawn a ni tih a sawi.
“He thil thleng hi mihringte chhiatna nasa tak thlen theihna a ni a, pawisawi lo nunna tam tak lak theihna a ni,” a ti.
Aden tumhmun hi Houthi-in an thunun loh zinga Yemen pawn lam atanga tlawhpawhna ber a ni a, Iran-in a thlawp pawlin kum 2014-a an khawpui, Sanaa an chhuhsak hnuah sorkar thuthmun awmna a ni bawk.
Houthi-te hian ‘Saudi sipai bungraw phur’ thlawhna, tumhmun bula Badr camp-a thleng tur an tum niin an insawi ve thung a. Saudi Arabia hi Yemen-a sorkar puitu a ni.
Yemen-a Saudi kaihhruaia sipai chakna hmanga Houthi nena inbeihna kal mek zelah helhovin an kah chhuah nia sawi ballistic missile chu Riyadh hmar lamah kah thlak a ni bawk.
Social media-ah Saudi kaihhruai tangrual sipai thupuangtu, Major-General Turki al-Maliki-a chuan a kah chhuahna an chhuinaah Sanaa atanga kah chhuah a nih thu leh an kahna chhuahna hmun hi tihchhiat nghal an tum thu a sawi.
Thawhlehnia Houthi-in thuchhuah an siamah chuan zan leh Nilaini tuk thlengin Riyadh leh Abha-a Saudi international airport an bitum dawn tih an lo sawi tawh.
Yemen-a indona hi US-Israel tang dunin Iran an beihrawn atanga irh chhuak thar leh a ni a. Saudi-in a thlawp sorkar sipaite chuan Houthi-ten Red Sea lawng chawlhna, Mocha leh tui kawng pawimawh, Bab al-Mandeb strait an beih fo chhan let nan an che chhuak ve a ni.
Indona hi chhimthlanga Taiz province-ah a ni deuh ber.
Houthi-ten missile leh drone-in Yemen sorkar tumhmun bei
