Hmar Peoples’ Convention – Democratic, Lalhmingthanga Sanate Faction chu an ralthuam tungin nunphung pangngai zawh turin an rawn kir a. Ningani khan sawrkarin hemi puala program a buatsaih Central Training Institute Sesawnga neih hmanpuitu chief minister Lalduhoma chuan, Mizo mipuiin kan ramah helna a chhuah leh an remti tawh lo tih a sawi. Kumin April 14 khan Mizoram sawrkar leh HPC-D Lalhmingthanga Sanate Faction hian Sakawrdaiah inremna an ziak tawh a. Inremna angin an ralthuam tunga an rawn kirna hi buatsaih a ni.
Chief minister chuan, Mizoram ralmuan thu sawi apianga rilru sira lo lang thin chu HPC (D) an ni, tiin, inrem duhin inhawng takin an indawr a. Home minister leh a thawhpuite thawhrimnaah an lawm hle tih a sawi. “Tunah chuan thinlung dam takin Mizoram chu state ralmuang tak a nih thu chhuang takin kan sawi thei tawh ang,” a ti.
Mizorama remna leh muanna a awm theihnana a kalsan tak leh a thil chan a ngaihtuah a. Nunna hlut zia, ralmuan nawm zia a ngaihtuah tih Lalduhoma hian sawiin, “Remna man hi a to a. Vawiina ralthuam dahtute kan ngaihlu che u a, mi huaisente chauh hi an tlawm ngam thin. Mizo mipui chuan helna hi kan ramah a lo chhuah leh kan remti tawh lo a. Chutiang ur chhuak thei thil reng reng chu tuma’n ching tawh lo ila, helna leh innghirnghona ti chhuak thei thil lakah kan zain inthiarfihlim ila; kan ramah remna leh muanna tluantling nei zui zel turin tangrual ang u,” a ti.
Mizo zingah tumah Mizo hnam bik an awm loa. Kan zavaiin Mizo kan ni tih a sawi. Mizo hnam chhunga hnam peng zingah mahni puala dinchhuah tuma beitu awm ta se, tumah an dinchhuah a rinawm loh, tiin, Mizo nihnaa kan lungawi tlan a, kan inpumkhat hian kan dingchhuak zawk dawn tih a sawi.
Home minister K Sapdanga chuan inrem tura rawn chhuak HPC-D (LF) cadre-te an lo lawm tih a sawi a. He inremna thlen theih chhan bulpui chu inremna duh chief minister Pu Lalduhoma a ni, tiin, “Mizoramah remna a awm theihnan central service hna zahawm tak bansantu a ni. Vawiin thlengin remna a ngaihlu zui zel a, kan ram tan ‘remna chhinchhiahna’ a tling a. Ram tana in rammut chhan tihlawhtling turin state sawrkar nen kan thawkho tawh dawn nia,” a ti
Assembly speaker, Chalfilh bialtu MLA Lalbiakzama chuan, ‘Hmar demand area’ chhunga ruling party MLA awmchhun a nih angin, remna neih chu a thupui ber pakhat a ni, tin, inremna a awm ta chu a lawm hle tih a sawi a ni.
Ralthuam tung ta HCP-D hotu Lalhmingthanga Sanate pawhin, Mizoram hmar leh hmarchhak lam ngaihsak an tul tih sawrkarah an tilang a, an tih lan dan erawh mi zawng zawng hriatthiam zawng a ni lem lo tih an pha lo tih sawiin, kum 23 hnuah Mizoram sawrkar tharah inremna thuthlung an siam a, inremnaah hian an duh zawng zawng kim vek lo mah se, an mipui leh anmahni duhsaktute avangin an lo chhuak tih a sawi a ni. Sawrkar a inhawng hlea an hriat thu sawiin, Manipur lama hnam buaina a chhuahin an unaute harsatna hrerengin Tuivai lei an dawhsak a, Mauchar kawng chhe em em siam dan kawng an dapsak a, hmar bial hmasawnna atana hma an lakna dangte an hmu a, thawkho turin an ring ngam tih a sawi a ni.
HPC-D (LF) cadre-te hian an silai leh ralthuam Mizoram Police IGP (Hqrs) H Ramthlengliana kutah an hlan a, senior SP (CID) kaihhruaiin ralthuam lek tawh lo turin an intiam zui a ni.
HPC leh HPC-D leh inremna:
8 Kum 1986-a Mizoram Peace Accord ziah a nih khan Hmar hnamten an beisei a phak loa ngaiin HPC an din.
8 1994 July 27-ah Hmingchungnunga kaihhruai HPC leh Mizoram sawrkarin inremna ziakin ralthuam an tung a, Sinlung Hills Development Council a ding.
8 He inremnaa dam thei lo mi thenkhatin HPC(D) a din a, chuta an hruaitu hmasa ber chu tuna ralthuam tung thar Lalhmingthanga Sanate hi a ni.
8 HPC(D) H Lalsangbera Faction lam chu sawrkarin 2018 April 2 khan inremna a ziahpui a, ralthuam an tung.
8 Tun tuma inremna neihpui leh tak Lalhmingthanga Sanate Faction hi kum 2024 atang khan sawrkar nen hian an inbe tan a, tum 4 an inbiak hnuah inremna ziah a ni ta a. Heti hian Mizoramah hnam bil hel pawl an awm tawh loa ngaih a ni.
HPC-D (LF) ten ralthuam tung fel Mizo mipuiin helna duh tawh lo: – Chief minister
