MNF MP-te chungchang a sawi danah hrereng chungin mipui bum tuma thudik lo sawiah MNF chuan chief minister Lalduhoma an puh.
MNF Gen. Hqrs. thuchhuak chuan, ZPM party-in MP inthlan atana campaign an hawn tumin, chief minister Lalduhoma hian MNF MP-te chu NDA Parliamentary Whip thununna hnuaia awm anga sawiin, NDA Whip kalha vote an thlak chuan MP atanga ban tir (disqualify) theih ang leh chumi avanga duhnaa vote thlak thei lo thin angin sawi a ni, tiin, politics khelh dan tha lo ber chi, hrereng chunga mipui bum tumna a ni tih a sawi.
MNF MP-te chu MNF ticket-a thlantlin an nih avangin eng Whip mahin a thunun loa, NDA kalha vote an thlak avanga disqualify theih pawh an ni loa, Mizoram, Mizo hnam leh sakhua himna khawih thilah huaisen takin central sawrkar pawh an dodal thin tih a taka hmutu leh hretu chu mipui an ni tih a sawi bawk.
‘Pu Lalduhoma hi Whip tih tawngkam behchhan ber India danpui schedule 10-na hmanga MP leh MLA atanga disqualify tawk tawh, he dan hrechiang bertu tur a ni a, he dan hi thlantlin an nih hnua party dang zawmtu, anmahni candidate-a vawrh chhuaktu, party duh dan kalha vote thlaktu, MP leh MLA-te disqualify theihna a ni a. UPA emaw INDIA emaw NDA emaw anga party hrang hrangte awm hona ang chi ah whip a awm loa, party mal tin inkhuahkhirhna a ni zawk,’ thuchhuah chuan a ti.
Hetihlaia MNF MP-te NDA Whip thununna hnuaia awm ang leh an duhdan kalha vote thlak thei lo anga a sawi hi hriatsual palh vang niloin, hrereng chunga langsar taka dawt hmanga mipui bum tumna, politics khelh dan tha lo ber chi, mipuiin an hnawl tawh hnu a ni a, chief minister meuh thusawi atan chuan hniam kan tiin zahthlak kan ti hle a ni.
MNF MP-te chu MNF ticket hmanga inthlan chuh an nih thin avangin MNF Whip tih loh pawl dang reng reng whip-in a thunun lo tih a sawi nawn bawk.
Hrereng chunga mipui bum tumah MNF-in Duhoma puh
