Daily Newspaper

Hri darh dan a la kal mar

11

Khawvel tibuaitu Covid-19 hrilengin Mizoram pawh a tibuai mek a, hri darh dan hi a la kal mar hle. Mizoram hi hri darh zel thei dinhmunah a ding mek tih chu thuneitute ngaihdan a ni.

“Hri hi a la darh mek a, a darh dan hi a la mar khawp mai a. Mizoram khaw tin hian kan la him lo tih kan hriat a ngai. Mizoramah December-ah hri kai mi 5000 an tling ang tia chhut a ni a, hei hi a dik loh nan kan tan tlan a ngai a ni,” tiin Covid-19 chungchanga sorkar thupuangtu Dr Pachuau Lalmalsawma chuan The Aizawl Post a hrilh.

Mizoramah hian March thlaah hri kai hriatchhuah tan a ni a, April leh May-ah hriatchhuah an awm lo. June atangin hriatchhuah hi thla tin an awm ta zel a, tam tham tak a ni ta zel bawk. Thla liam ta November kha hri kai hriatchhuah an tam ber thla a ni lehnghal.

March-ah khan hriatchhuah zat chu pakhat a ni a, thla hnih chhung hri kai an awm loh hnu-ah June-ah a zuang ta dawrh a, mi 159 hriatchhuah an ni. September thleng khan thla tin a pung a, September-ah hian mi 1006 hriatchhuah an ni. October-ah a tlahniam leh deuh a, sang tling lo, mi 740 hriatchhuah a ni. Mahse tlahniam zui lovin November-ah a pung leh a, hriatchhuah zat hi mi 1089 niin, hri kai hriatchhuah an tam ber thla a ni.

Hri kai hriatchhuah tam ber thlaah hian mi 37,249 endik an ni a, thla chawhma lam, ni 15 thleng khan mi 638 hriatchhuah niin, thla chawhnu lamah a tlahniam a ni. Hri kai hriatchhuah tam ber thlaah hian covid-19 vangin mi paliin nunna an chan.

Dr Pachuau Lalmalsawma chuan Mizoramah a vanglai a thleng tawh em tih hriatthiam a har thu a sawi a, a vanglai a thleng tawh nge a la vanglai dawn chauh tih hi sawi theih a ni rih lo tih a sawi. December thla hi Mizoramah mipui chetvel thla a nih thin thu leh hri kai an pung vak ang tih a hlauhawm thu a sawi.

“Khaw tin hian kan la him lo tih hi pawm tur. Bird flu len lai pawhin Australia-in him an inti a, mahse rei lo te chhungin hri an kai a, an inkaidarh a, khatiang kha thil thleng thei a ni. Hri laka inven dan hi Mizo chuan kan hre tlangpui ang a, chumi zawm chu kan tih tur a ni,” Dr Malsawma chuan a ti.

Mizorama Covid-19 hri darh dan
Thla +ve zat
March 1
April 0
May 0
June 159
July 253
August 599
September 1006
October 740
November 1089

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy