Daily Newspaper

Hri darh theihna sang mekah sawrkar a inthlahdah tual tual – MPCC

9

A hma zawnga aia mipuia Covid-19 kai darh theihna a san tial tial laiin, sawrkar chu a inthlahdah telh telh niin Congress party chuan an sawi a. MIpui himna leh hriselna MNF sawrkarin a ngaihtuah tak tak lo nia an ngaih thu an sawi.

MPCC thupuangtu Dr Lallianchhunga chuan, Covid-19 dotu frontline worker-te sahimna tur leh hri kai an lo awm palha enkawlna tur sawrkarin a ruahman fel tawk loa, frontline worker thenkhat chuan anmahni inenkawlna tur an intumchawp a ngai hial a, Mizoram khua leh veng hrang hranga task force-te puitu, thla engemawzat Covid-19 dotu volunteer-te sahimna tur leh an positive palh pawha enkawlna tur engmah ruahmanna mumal tak tun thlengin siam a la neilo, tiin a sawi. “Hei hian Covid-19 dotute himna leh hriselna MNF sawrkarin a ngaihthahzia a entir chiang hle a. Hei vang hian containment zone-ah pawh tlawmngaia task force duty peih pawh an awm tawh loa, police duty an awm bawk si loh avangin containment zone hi a zalen hle,” a ti.

Covid-19 hri kai, Covid Care Centre (CCC) a enkawl mek thenkhat, ITI Veng CCC ami leh Lily Veng-a awm hri kai pakhat angte pawh an result a negative vang pawh ni lo, CCC-a ni 14 an awm tlin tawh vang ringawtin sawrkarin a chhuahtir thu leh hnamdang engemawzat phei chu positive chunga chhuahtir an lo nih tawh thu a sawi.

“March 24-a positive pakhat lek Mizoramin kan neih lai pawha kan chiai dan leh veng hrang hrangin positive case rinhlelh awm vanga tun thlenga inkharkhip an kalpui dante ngaihtuah chuan, mipui himna leh hriselna hi MNF sawrkar hian a ngaihtuah tak tak lo tih a chiang hle,” Dr Lallianchhunga hian a ti.

A hma zawng aiin he hri hi mipuia a darh theihna a san hle tawh thu leh Health ministry phei chuan December-ah hri kai mi 5000 Mizoramah awm turin an chhut tih sawi reng si a, mipui himna leh hriselna lam ngaihthah hle si MNF sawrkar chu a puh a. “MNF sawrkar hian Covid-19 hi mipuiah darh se pawi a ti miah lo tihna a ni. Congress party-in kan hlauhthawn ang chiahin Aizawl khawpui veng thenkhatah local council inthlan vangin hri darh mai thei dinhmunah an din laiin, veng thenkhatah hri kai awm chuang lo, home quarantine chhungkaw thenkhat an awm vang ringawtin inthlan sawnhlat a ni lawi a; heng home quarantine-a awmte hi Covid-19 an kai leh kai loh pawh test an ni chuang lo,” a ti.

Covid-19 a darhzau zel vangin test tam thei ang ber kalpui a tul ta hle tih MPCC thupuangtu hian sawiin, he hriin thla ruk min chenchilh hnu ah pawh MNF sawrkar chuan RT-PCR test theihna BSL-2 pahnih bak a la siam puitlin loh thu te, CM Relief Fund atanga lei TrueNat khawl pawh hman vek theih a la nih loh thu leh, US company Thermo Fisher Company siam RT-PCR khawl, nuai 22 man, kumin June-a chah tawh anga an insawi pawh tun thlengin Mizoram a lo thlen awm hriat a la nih loh thu te a sawi bawk.

MNF sawrkar chu Mizorama sawrkar awm tawh zawng zawngah pawisak neilo ber, dan leh mipui zahna neilo berah MPCC Media Department chairman Dr Lallianchhunga hian a puh a. “Inthlan chungchang thlengin, an chan thatna tur a nih chuan engmah pawisak an neilo. State sawrkar chakna tanchhanin hmun tam takah mipui thlanchhuah village council/ local council, party dang mite MNF-a inlet turin a thlemin a vau nasa hle. Hetiang em ema mipui duhthlanna zahna neilo leh pawisak neilo hi Mizoramah sawrkar an la awm ngai lo,” a ti.

Hrilen vanglai pawh sawi loin VC leh LC inthlana chak dan ngaihtuahna avangin buarchuar taka inthlan buatsaihah MNF sawrkar chu a puh bawk. “March atanga inbuatsaih tan daih tawh tur a nih laiin, inbuatsaihna hun a awm lo, tiin chhuanlam an siam a. Vote thlak tur mipui mamawh tawk polling booth an siam loa. September 4-a VC leh LC inthlan turah pawh a hma aia social distancing kenkawh that tum siin voter 700 vel tan polling booth pakhat chauh siam an la tum tho. August 27-a LC inthlan khan veng engemawzatah zan dar 8 vel thlengin mi 700 tling loin vote an thlak thei hram a. Election chungchangah mipui inzirtirna mumal a awm loh avangin vote thi a tam em em a, result tidanglam dawrh tham vote thi a awm a ni,” MPCC thupuangtu hian a ti bawk. Heti chung hian, khua leh veng tam takah mipuiten MNF candidate-te hnawlin eptu party candidate-te huaisen takin an la thlangtling zawk niin a sawi.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy