Daily Newspaper

Hri inkaichhawnna chhutchah a ni – Health minister

45

Aizawl, October 5 : Tunhnaiah Mizoram, a bikin Aizawl khawpui chhunga Covid-19 hri inkaichhawnna ‘transmission chain’ chu chhutchah a ni a, vantlangah chhui hleihtheih loh khawpa hri leng darh tur chu thawhhona tha avangin ven a ni tih Health minister Dr R Lalthangliana chuan a sawi.

Health & Family Welfare minister hian thuchah siamin, kumin September thlatir lam khan nikhat thilthu-ah Covid-19 kai an hmuhchhuah zat a pun deuh thur thur avangin sawrkar hotuten uluk taka ngaihtuahna sengin Aizawl khawpui huamchhunga inkharkhip (partial lockdown) ni 10 chhung kalpui a ni ta tih a sawi a. Mipuiten kan thattlanna tur a ni tih hria a, phunnawi lo leh dawhthei taka hotute ruahmanna kan zawm avang khan a hlawhtlinna rah kan hmu nia a lan thu a sawi.

He partial lockdown chhung hian contact tracing titu team-in ngawrh taka chhuizuiin, sample lakhawmtuten zankhaw tairek thleng thlengin veng tinah kalkualin swab sample an lakhawm a. ZMC RT-PCR laboratory-in tlaivarin chawlh hahdam pawh sawi loin sample test hna an thawk tih minister hian a sawi. Partial lockdown chhung khan sample 15000 vel lakkhawmah sample 10589 test niin hri kai hmuhchhuah zat hi 141 a ni tih a sawi a ni.

Sample lak a tam avang hian test result tihchhuah kawngah duh anga kal chak theih a nih tak loh thu sawiin, heti chunga dawhthei taka an lo nghah hram hram avangin sample test result nghaktut chungah an lawm hle tih a sawi bawk.

“Partial lockdown tum ber chu contact tracing zawhfel a, sample lak ngai tihfela ‘transmission chain’ chhutchah a ni. Community spread thleng lo tura theihtawp chhuahtu – task force, sample collecting team, contact tracing team bakah a test tute, police leh sawrkar department hrang hrang, media, kan zavaia thawhrimna leh thawhhona rah kan seng a ni,” a ti.

Tunah chuan hri kai thar hmuhchhuah loh ni a awm tak fo thu leh hmuh thar tam zawk chu state pawn atanga rawn lut, khunghran lai an nih tak thu te Dr R Lalthangliana hian a sawi a. “Hei hian a entir chu, he hri lakah hian kan fimkhur a, tangtlanga sawrkar ruahmanna kan tihhlawhtlina kan zawmthat chuan, hri darh zel tur lakah Mizoram hi kan inveng thei, tih hi a ni,” a ti.

Hrileng laka kan dinhmun a ziaawm chho deuh nia a lan rual hian, inthlahdah phah a hlauhawm tih sawiin, tunah hian Europe ram tam takah chuan hrileng thawhhnihna ‘scond wave’ an tawng chho mek tih a sawi a ni.

Covid-19 kai leh kai lo enfiahna lamah, Falkawn Referral Hospital-a TB laboratory BSL-3 awm sa chu hmanhmawh taka cheibawlin virus test nan an hmang ta tih Health minister hian a sawi a. He laboratory hmang tur hian sawrkar laipuia thuneitute phalna dil hmasak vek a nih thu a sawi.

“ZMC-ah hian Viral Research Diagnostic Laboratory kan nei dawn hnai a, hei hi ICMR-in medical college-a awm tura a tih pawimawh tak zing ami a ni. Virus hmuhchhuahna laboratory changkang tak a ni a, Covid-19 kher ni lo, virus chi hrang hrang zirchianna tur a ni a, hrileng dang lo awm leh thulhah pawh la tangkai tak tur a ni,” a ti. VRDL dinna tur hi kumin March-a an thlen daih tawh, ICMR an muangchang deuha an hriat avanga na taka an bawhzui a ni tih a sawi a; kumin kumtawp lamah chuan hman tan theih beisei a ni tih a sawi bawk.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy