Daily Newspaper

Hri kai enkawl mek sing an chuang

14

Mizorama Covid-19 kai enkawl mek chuan sing an chuang tawh a, hri kai hmuhchhuah tawh atanga chhutin enkawl mek hi zaa 30 chuang an ni.

Kum 2020 March thlaa Mizorama Covid-19 kai an awm ve hnu ah, he hri kai avanga enkawl mek chuan sing an chuang ve ta a, nunna chan pawh 140 an tling ta. Nitina hri kai hmuhchhuah chu tun July thla chhung hian 500 chunglam a ni reng a, July 27-a sample endik bikah mi 700 chuang hmuh leh a ni.

July 28 tlai dar 5.00 thlenga chhinchhiah danin, Mizoramah sample 6,03,282 endik an awm tawh a, heng zinga 35,297 chuan Covid an kai tih hmuhchhuah a ni. Hri kai hmuhchhuah zinga 24,496 chu enkawl dam an ni tawh a, he hri kaihhnawiha nunna chan 140 an awm tawh. Hri kai hmuhchhuah atanga chhuta nunna chan hi zaah 0.40 a ni. Enkawl mek 10,661 awmin, hri kai hmuhchhuah tawh atanga chhutin zaa 30.20 a ni.

Aizawl district chu enkawl mek tamna ber a ni chhunzawm zel a, enkawl mek 10,661 zinga 7,866 (73.78%) chu Aizawl district-a enkawl an ni. Hri kai enkawl mek tamna ber dawttu chu Lunglei district niin, 904 an awm. July 28 tlai dar 5.00 thlenga chhinchhiahah hian Khawzawl district chu Covid vanga enkawl mek awm lohna district awmchhun niin, an ni hi July 26 atang khan an fihlim rih a ni.

July 27-a sample 5,206 endik atangin Covid kai hmuhchhuah 727 an awm a. RT-PCR laboratory-ah 181 hmuhchhuah niin, TrueNAT ah 66, Rapid Antigen Test ah 480 hmuh an ni. Sample endik tawh zawng zawng atanga hri kai hmuhchhuah hi, 2011 chhiarpui atanga chhutin mihring 1,000 zelah 32 a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy