Daily Newspaper

Hri kai hmuhchhuah ran theih nan Inentirna tur hmun 20-ah siam tawh

19

Covid-19 kai zingah an taksaa a natna engemaw ber langchhuak tawh, hri an kai leh kai loh hre tura inendik tir lawk lote chu hri an kai tih hmuhchhuah a nih meuh chuan an nunna atan pawh pawi thei khawpin an taksa a lo chhe hman tawh thin, tih chu doctor-te sawi dan a ni a. Hri kai hmuhchhuah ran a nih theih nan Aizawl leh a chhehvel hmun 20 ah sample endikna bik – Kiosks/ mini Kiosks 20 siam a ni tawh.

Covid-19 kaihhnawiha Mizoram sawrkarin thupuangtua a ruat Dr Pachuau Lalmalsawma chuan tunhnaiah Mizoram hmun hrang hrangah hostel leh home bakah punkhawmnaah Covid-19 inkaidarh a hluar leh tan mek tih a sawi a. Covid virus kai si, inendik mai loh hian nghawng chhe tak a neih theih avangin, nunna hlu tak kan chan zel lohna turin Covid-19 symptom neite ngaihven leh ngaihsak chu mitinten kan mawhphurhnaah kan ngaih a tul hle tih a sawi.

“Kan chhungte leh hnaivaiten Covid symptom an neih chuan a rang thei ang bera task force hriattirin Aizawl khawpui hmun hrang hranga man chawia inendik theihna hmun, Kiosks-ah rang taka endik tur a ni. Tunah chuan mahni invil chungin home isolation a tih theih tawh bawk avangin, mahni inringtawk taka inendik hma hi nunna himna atan pawh a pawimawh hle a ni,” a ti.

Aizawl khawpui chhungah Mega Kiosk pakhat Vanapa Hall-ah a awm a; Kiosk hi veng hrang hrang 13 – Bawngkawn South, Chawlhhmun, Dinthar, Durtlang, Zemabawk North, ITI Veng, Kulikawn, Zotlang, Chaltlang, Ramthar, Armed Veng South, Mision Vengthlang leh Sihphirah te siam a ni tawh. Mini-Kiosk pawh veng 6 – Hunthar, Electric Veng, Bethlehem Vengthlang, Muthi, Selesih leh Leitan-ah dah a ni tawh bawk.

Covid-19 symptoms tlanglawn zual lanchhuah dan hrang hrang – khawsik, khuh ro, hrawk za leh hrawk na, lu na, taksa na leh kham them thum, taksa chak lohna leh luhaina, chaw leh thil ei tui lohna, thil rim hriatna hloh, luak chhuak leh luak, pum nuam lo leh kawthalo, thawhah leh boruak kham khawp lohna neite chuan a rang thei ang bera inendik tir ngei ngei turin mipui a chah nawn a. Covid do hna chu mipui tan leh mipui programme, tanrualna nen chauha hneh theih a nih avangin hmaituam, kut tihfai leh a theih chin chinah midang nena inchiahpiah lo turin mipui a ngen nawn bawk. Covid-19 vaccine a bikima la la lo ten a hmalama la turin a chah thar a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy