Daily Newspaper

Hri kai Ibra

8

AC Milan tan league season bultanna lama ropui taka inlan tawh Zlatan Ibrahimovic chu Ningani khan coronavirus test-ah a positive tih hmuhchhuah a ni a, in lamah a inkhunghrang nghal a, Ningani vek Europa League third round qualifying match pakhata 3-2 Bodo/Glimt an hnehna game pawh a khel thei ve ta lo.

Ibra result hriat a nih lai hian a team-mate Leo Duarte pawh positive test result neiin, Milan chuan squad member dangte chu an negative tih an puang a, Europa League match khel zuiin, an thiampuipa tel loin hnehna an chang.

Ibrahimovic chuan Ningani khan Twitter-ah a dinhmun sawiin, “Niminah ka negative a, vawiinah ka lo positive leh reng a, keimahah symptom engmah a lang lo,” a ti.

Barcelona, Juventus, Ajax leh Inter Milan forward hlui Ibrahimovic hi thla thar maia kum 39 tling chho tawh tur ni chungin Serie A player zinga hmatawng hlauhawmber pawl a la ni pha a, thlathum an chawlh hnu June thlaa league khelh chhunzawm a nih khan test-ah a lo positive tawh bawk a ni.

Europe-a player ngainat hlawhber pawl Ibra hian kumin January thla khan a vawihnihna atan Milan a zawm a, match 22 a khelh tawh atanga goal 14 thun tling tawhin, Milan team-in harh-tharna an chan kawngah a meizang hlaptu a ni.

Thawhtanni mai pawh khan a la inkhel a, Serie A season thar bul a tanna inkhelah a goal hnih thun hmangin Milan chuan sihnih faiin Bologna an hneh nghe nghe.

Milan hian karleh Europa League qualifying play-off tie lamah Rio Ave an su leh dawn a, chumi hma, naktuk, Pathianni hian Serie A lamah Crotone an luhchilh leh phawt ang.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy