Daily Newspaper

Hri kai zinga 83% dam tawh, hri kai tawh zingah hnam dang tam zawk

38

October ni 4 thlenga result hriat tawhah Mizoramah Covid-19 natna vei mi 2120 hriatchhuah an ni tawh a, an zinga 83.58% chu an dam tawh.

Integrated Disease Surveillance Programme (IDSP)chhinchhiah danin, Mizoramah Covid-19 natna vei hriatchhuah tawhte zinga mi 1772 chu an dam tawh a, enkawl lai mi 348 an awm.

He natna vei hriatchhuah tawhte hi mipa 1753 leh hmeichhia 367 an ni a, hriatchhuah tawh zat leh enkawl lai zat hi Aizawl District-ah a tam ber ve ve.

IDSP chhinchhiah danin Mizoramah sample 82.610 enfiah tawh a ni a, Covid-19 natna vei hriatchhuah tawhah hian a tam zawk chu hnam dang an ni.

Hri kai hriatchhuah tawh mi 2120 zinga mi 1249 (58.91%) chu hnam dang an ni a, mi dang 871 (41.09%) chu Mizoram mi an ni.

He natna vei hriatchhuah tawhte zinga a tam zawk chu Mizoram pawn atanga rawn lut an ni a, mi 1522 niin, state pawn atanga rawn lut hi 71.79% an ni. Tualchhunga hri kai hi mi 598 an ni a, 28.21% an ni.

Positice case neih lai mi 348 zingah hian a tam ber chu para-military force leh Indian Army an ni a, mi 235 niin, za zela chhutin 67.52% an ni. Civil mi hi mi 113 an ni a, za zela chhutin 32.47% an ni.

Chawlhni khan October ni 3-a enfiahte result hriat a ni a, positive hriat thar mi 17 an awm.

An zinga 13 chu Lunglei TrueNAT laboratory-a hriatchhuah an ni a, mipa vek, kum 33 leh 51 inkar niin, 12 chu BSF, pakhat chu Indian Air Force a ni. An vai hian Mizoram pawn atanga rawn lut an ni.
Champhai District-ah hriatchhuah thar mipa pahnih an awm a, Guwahati atanga rawn haw, khung hran lai ve ve, kum 27 mi leh kum 37 mi an ni.

Mamit District-ah hmeichhia, kum 64 mi chu hri a kai tih hriatchhuah a ni bawk a, Thinghlun khaw mi niin, Assam atanga rawn hawn, inkhung hrang lai a ni. Lawngtlai District-ah mipa pakhat, kum 23 mi, RK-RPP road construction company-a an engineer niin, khung hran lai a ni.

Chawlhni-a result hriatah hian ZMC laboratory-a endikte an negative vek; RT-PCR hmangin sample 169 endik a ni a, an negative vek a ni. Rapid Antigen Test hmanga endik, hmun hrang hranga mite pawh an negative vek.

  • Mizoramah hri kai hriatchhuah tawh mi 2120 an awm
  •  Hriatchhuah tawh zingah mi 1772 an dam tawh
  •  Hri kai hriatchhuah tawh zinga 58.91% chu hnam dang an ni
  •  Hri vei enkawl mek zinga 67.52% chu force mi an ni
(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy