Daily Newspaper

Hri kaina hriat mai loh mi 4 hmu thar

8

Covid-19 kai leh kai loh endik zingah an kaina hriat nghal theih mai loh mi pali kai thar an awm. Heng avang hian veng/khua pathumah containment zone siam mek a ni.

Zoram Medical College laboratory-a sample endik zingah tualchhung mi, tualchhung atanga kai, an kaina awm tinzawn nghal theih mai loh chu Inrinni-a result chhuakah pakhat leh Pathianni-a result chhuakah pathum an awm a. Chanmari West local task force member, kum 24 mi chu Pathiannia hmuh thar zingah hian a tel. Chanmari West LLTF hruaitute sawi danin, an venga inkhunghrangte sample an lak chu remchangah la in, inrinhlelhna nei lo, LLTF member a nih anga sample laktir ve a ni a, hri a kai tih hriat chhuah a ni chauh a ni. Amah hi pawn chhuak tam lo, tunhnaia hri kai sulhnu chhui kaihhnawihah pawh la tel ngai lo a ni a, a kai dan hi rinzawn mai a har thu an sawi.

Rinzawn mai theih awmchhun nia an hriat chu, hri kai u hi Chaltlang Lily Venga hri kai hmuhchhuah tawh zinga a nau nen an thawk dun a, a u thawhpui hian hri a kai lo tih finfiah a nih tawh avangin hna pawh a pangaiin an thawkho leh tawh nia sawi a ni thung.

Pathianni khan a chenpuite swab sample lak nghal a ni a. Chanmari West-a an awmna YMA section huamchhunga chhungkaw 18 chu home quarantine an ni. An ni bakah an section thenawma chhungkaw pakhat pawh inkhunghran tir nghal an ni.

Pathiannia ZMC atanga result chhuakah vek hian an kai dan hriat mai theih loh, Thingsul Tlangnuam mi pahnih an tel bawk. Thingsul Tlangnuam village task force hruaitute sawi danin, hri kai hmuh thar mi pahnih hi Seling – Champhai kawng zauh hna thawktu GVV Construction Pvt. Ltd. hnuaia thawk an ni. Hri an kai theihna awmchhun nia an rinzawn theih mai chu, ITI Covid Care Centre atanga September 1-a hri kai chunga chhuahtirte zing ami chu an pahnih hian an hruaichhuak a, hri kaite nen hian an intawk lo ni chuan an insawi. ITI CCC atanga chhuahtirte hi September 2 zanah CCC-a dahluh leh vek turin sawrkarin a ti a; an ni, a hruaichhuaktu zinga tel te hi September 3 khan an swab sample lak ve a ni a, hri an kai tih hmuhchhuah a ni ta mai a ni.

Aizawl district bawrhsap chuan Thingsul Tlangnuamah hian September 6 zing dar 9.00 atang khan containment area-ah puang nghalin, luh leh chhuah khap a ni. Health department thurawn angin task force lam chuan hri kaiten an kaichhawn theiha ngaihte hi an chhui nghal a, mi 23 chu test tura tih an ni. Hei bakah hian Thingsulthliah Pioneer camp-a awm hri kai mi 15 hmuh thar an ni a, helai hmuna BRTF-ten state pawn atanga an mi rawn luttharte an khunghranna hmun chu, hri kai hmuh an awm tak avang hian camp-a hnathawk thin mi 9 chu test tura an thlen tur thu an sawi bawk.

Inrinni-a ZMC-a endikte result chhuakah Zemabawk Veng ami, a kai dan hriatchian nghal mai loh pakhat a lo awm tawh bawk.

Thudawn danin a ni hi local council inthlan buaipuitu tura ruat zingah telin, August 24 leh 25 khan Govt. Mizo High School-a inthlan kaihhnawih training-ah a kal a, heta traning zingah hri kai an awm thu hriat niin, hnu chhuinaah a ni hi an veng task force hnenah a in report ve a; Zemabawk Veng ‘containment area’ a puan a nih chhung, September 2 khan sample laksak a ni a, sample 48 endikte hri lakah an fihlim vek nia puan a nih hnu, September 4 khan containment area-a puan an nih phelh dilna chu sawrkar thuneituten an remtihsak ta nghe nghe a ni.

Hetihlai mek hian a ni hi September 4 zana sample endik result tihchhuah zingah hri a kai tih hriattir a ni leh lawi a, a hmaa result chhuakah tihdikloh a awm avangin, negative anga sawi tawh chu a lo positive leh si nia sawi a ni.

Fimkhur thilah a chenpui a chhungte leh an chhungkua nena inhnimhnai zualte chu inkhunghrantir an ni a, veng pum ang chuan an inkharkhip lo tih thu dawn a ni.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy