Daily Newspaper

Hri thar hi ….

28

Tun hnai khan Mizoramah, Delta Variant bakah COVID-19 hrik chi dang Alpha Variant leh Eta Variant a awm tih finfiah a ni a.

Hemi chungchangah hian, State Nodal Officer & Official Spokesperson on COVID-19 Dr. Pachuau Lalmalsawma chuan COVID-19 hrik chhuak thar a awm leh awm loh finfiah tura Mizoram atanga COVID-19 positive te swab sample 100 Whole Genome Sequencing tura National Institute of Biomedical Genomics (NIBMG), Kalyani, West Bengal-a an thawn result tun hnaiah an hriat thu sawiin, sample 100 an thawn zinga 75-ah COVID-19 hrik thar chi thum hmuh a nih thu a sawi a ni.

Tun dinhmunah, Mizoramah hian coronavirus hri kai hi an pung chho zel niin a lang a. Hetih mek lai hian, hri chi dang pawhin min luhchhuah mek tih a lo lang ta bawk a. Hri thar a lo chhuah hma pawha fimkhur a ngaih thu kan inhrilh mek laia hri thar lo chhuak laka fimkhur lehzual tura inhrilh a ngai ta hi a vanduaithlak hle.

Tuna hrithar leng leh mek hi engtiang taka mihring tana hlauhawm thei nge a nih tih chu sawi chian fak theih ni lo mah se, Covid-19 ang thova hlauhawm emaw, a aia hlauhawm daih emaw, hlauhawm nep zawk emaw pawh a ni thei.

Hrileng hi kan tuar mek a, thihpui pawh kan thahnem ta hle. Kan dam emaw, kan thi emaw, engahmah hian thu kan nei lo va, chutih laiin hri laka himna tura tihtur kan zawm hi kan damna a ni tih erawh a lang.

Tuna kan dinhmunah hi chuan, hri thar eng ang pawh lo chhuak se, hri kai lo tura mithiamten tihtur an sawi zawm mai hi hri laka himna kawng pawimawh ber a ni tih hi kan vawn reng a pawimawh. Hri thar emaw, hri leng mek emaw pawh ni se, hri inkaidarhna laka himna tur kawng hrang hrangte tha taka kan zawm hi thil pawimawh ber a ni tih kan hriat fo a pawimawh a ni.

Hri thar a lo chhuak tih thawm kan hria a, hri thar hi hrileng mek aia a hlauhawmna emaw, hrileng mek aia a hlauhawm nep zawkna emaw a awm a nih pawhin, thil pawimawh ber chu, hri kai lo tura fimkhurna kawng hrang hrang zawm tlat hi a la ni fan a ni.

Hri thar hi chu a lo chhuak zel dawn, eng hri thar pawh lo chhuak se, a lo dona atana pawimawh ber chu, mithiamten an sawi, thil pathum- hmaituamna, insifai uluk leh midang nena inhlat taka awm, tih bak hi thil thar a awm thei lo. Thil zawm harsa lo tak hi engatinge kan harsat tlat si tih hi zawhna pawimawh tak a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy