Daily Newspaper

HRIAT RENGNA

32

PC Thangzikpuia

Inngaihhruina thu leh thlan lung (‘thlanlung’ ni lovin)-ah te ‘hriatrengna’ tia ziah zawm hi kan hmu fo ang a; amaherawhchu, tun hnaia grammar lama kan thanharh thar tâk mêk avang hian, hetianga title case angreng atâna ‘hriatrengna’ tia ziah zawm pût mai hi a dik lo tih tunlâia thangthar grammar thiamte hi chuan an rawn hmu fiah ta mêk zel a; a inzawm lova ‘hriat rengna’ tia ziaha compounded verbal noun a nih hian Mizo tawng grammar kal phunga a dik zâwk dan hi grammatically-a sawi fiah kan tum ve leh dâwn a ni.

Mizo tawnga thu hnung bet (suffix) kan neih zinga ‘na’ hi noun siamna ‘verbal noun marker’ a ni a, verb thumal bâkah verb atâna hman theih thumal dangah pawha bet thin a ni a. Modified form nei lo thumalah chuan a root word-ah a bet mai a; modified form nei chi thumalah erawh chuan a subjunctive mood form-ah zel a bet thin thung a; a behna thumal chu verb zia kawl chunga noun nihna nei ‘verbal noun’-ah a chantir ta thin a ni.

Entir nân: intransitive verb thumal ‘mû, thû, ding…adt.’ tihah te leh transitive verb thumal ‘awt, vua, ziak…adt.’ tihah te hian suffix ‘na’ hi a beh chuan an subjunctive mood form-ah zel a bet thin a. Tichuan, suffix ‘na’ behna intransitive verb thumal subjunctive form ‘mutna, thutna, dinna…adt.’ tihte leh suffix ‘na’ behna transitive verb thumal subjunctive mood form ‘awhna, vuakna, ziahna…adt.’ tihte hi verb zia kawl chunga noun nihna nei ‘verbal noun’ an lo ni ta a ni.

Hetianga verb thumal emaw, verb atâna hman theih thumal dangah te suffix ‘na’ hi a beha ‘verbal noun’ atâna kan sìam bâkah hian, verb zuitu adverb leh auxiliary verb-ah te pawh ‘na’ hi a bet thin bawk a. Chutianga verb leh adverb inkawp emaw, verb leh auxliary verb inkawp emawa suffix ‘na’ hi a rawn beh chuan, verb leh suffix behna adverb/auxiliary verb inkawp chu ‘compounded verbal noun’ a lo ni ve leh ta thin a.

Entir nân: ‘kal thin, zin tawh, hre chiang, siam tha…adt.’ tih ang chi, verb leh amah qualify-tu thumal inkawpte hi Mizo tawng grammar kal phungah chuan ziah zawm tur a ni lo a, henga verb thumal qualify-tu adverb/auxiliary verb-ah te hian suffix ‘na’ a rawn beh chuan ‘kal thinna, zin tawhna, hriat chianna, sìam thatna…adt.’ tih a lo ni ta mai a. Heng verb leh amah qualify-tu thumal, suffix ‘na’ hmanga kan modify tâkte hi noun nihna nei thu inkawp an nih tâk avang maiin ‘kalthinna, zintawhna, hriatchianna, sìamthatna…adt.’ tia thumal atâna ziah zawm daih hi a dik ta lo a; ziah zawm loha ‘kal thinna, zin tawhna, hriat chianna, sìam thatna…adt.’ tih a niha ‘compunded verbal noun’ an nih hian Mizo tawng grammar-ah a dik ta mai thin a ni.

Tun hmâ khân, “Noun chu ziah zawm tur,” tiin grammar hi kan lo inzirtir mai thin a ni àwm a, chu avang chuan suffix ‘na’ hmanga noun kan chher rêng rêng kha chu eng nge an nihna chiah hre fuh si lovin kan lo ziah zawm thâwr thâwr mai thin niin a lang a. Chutiang zir dan kal phung dik hlel kan lo vawn bel tawh chuan vawiin thleng hian kan tawng ziah danah hian hlet a la chhuah pawi ta zel a, ‘hriat rengna’ tia ziah tur te pawh ‘hriatrengna’ tia ziah tur emaw kan la ti ta fo mai a ni àwm e.

Kan sawi tâk ang khân ‘reng’ pawh hi verb sawi fiahtu ‘adverb of frequency’ a ni a, verb-ina thil tih a sawi kha a zin leh zin loh te, chhunzawm zel a nih leh nih leh loh te sawi fiahin a rawn qualify thin a ni. Chutianga verb thumal a rawn qualify-naah chuan a kawppui verb nen khân ‘hlim reng, dam reng, lungawi reng, inhmangaih reng, hre reng…adt.’ tia verb leh adverb an nih anga ziah zawm loh hian a dik ta mai a. Heta verb thumal qualify-tu adverb ‘reng’-ah hian suffix ‘na’ hi a rawn beh pawhin ‘hlim rengna, dam rengna, lungawi rengna, inhmangaih rengna, hriat rengna…adt.’ tia ziaha ‘compounded verbal noun’ a nih hian a dik zui ta nghal mai thin a ni.

Hengah hian suffix ‘na’ behna adverb thumal leh a kawppui verb hi ‘hriatrengna’ tia thumala chher tur emaw kan tih tlat mai chuan, a form anpui chiah chiah thu dangte pawh hi ‘hlimrengna, damrengna, lungawirengna, inhmangaihrengna…adt.’ tia kan ziah zawm ve a tul nghal dâwn tihna a ni ang a; kan tawng hi amâ grammar kal phung ni hlek lovin kan sawp hliam reng mai dâwn tihna a ni.

Mizo tawng hi amâ kal phung mil ngeia a ziah dan dik grammar-in a rawn hmuh fiah chhoh mêk zel lâi hian, tun hmâ atanga dik emaw kan lo tih liam mai mai thin tam tak kha a lo dik ziktluak loh dan hai lan thar a ni ta mêk zel a. Hengah hian mi thiam leh mi puitling chinte chuan mahni ngaih dan dah lal tum msi the lovin, grammatical fact nen meuha tar lan chin tawh hi chu a dik zâwk an lo hmu fiah ve nghal mai thin a, a lawmawm thin hle a ni.

Kan tu leh fa, thangthar chhuan lo la awm zel turte tân Mizo tawng ziah dan dik hnutchhiah kawngah hian mawh kan phur a; chuvangin, kan tawng hlu tak ‘Mizo tawng’ hi a amâ grammar kal phung mil ngeia chhep fel tura theih tâwp kan chhuah ho zel hi a tul ta tak zet a. Tuna kan sawi tâk ‘hriat rengna’ tih te pawh hi thlan lung leh inngaihhruina thu ziahah tea thupui angreng atâna kan hmannaah, ziah zawm loha compounded verbal noun a nih hian Mizo tawng kal phungah ziah dan dik zâwk a ni tih grammar atang chuan kan hmu fiah leh thei ta a ni.

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy