Daily Newspaper

Hrilen kum – chhungkaw kum

9

Kum 2020 chu a chhe zawng leh a tha zawnga hriatreng tur kum a ni a. Hrilen kum a ni a, hri chhia in nasa taka min nuai kum a ni. Hetihlai hian chhungkaw tam zawk chuan kum dang hun dang zawng aiin chhungkua in hun hlu tak an hman tam phah thung nia hriat a ni.

Nikum March vel atangin Covid-19 lengin kan nunphung a sawi danglam hret hret tan tiin a sawi theih a. Mimal leh chhungkua chauh ni loin, khawtlang leh kohhran thlengin kan hun hman dan a thlak danglam a. Nun danglam chuan kumhlui min her liam pui ta.

Hrileng vanga sawrkarin inkaihhruaina a siam dungzuiin pawl, khawtlang leh kohhran thil tih khawm hleih theih a ni lo kumtluan a. Mizo Kristiante hun pui – Krismas leh kumthar lawmna meuh pawh he kum danglamah hian neih theih a ni lo. Thingtlang hmun kilkhawr thenkhat, khaw lian vak loah chuan upa bial anga ruai theh sawi tur an awm nia sawi a ni.

Chutiang boruak rit tak karah chuan hrileng laka inkharkhip leh inkhuahkhirhna avangin chhungkuaa awmkhawm a tam phah lawi a, kumdang zawng aiin chhungkua an awmkhawm tam a tih theih. Hun pui a lo her chhuah meuh phei chuan chhungkuaa thil tihkhawm a tam a, kum danga chhungkaw tam takin an tihkhawm hman tawh loh, in hrang chang tawh te nen, in lam leh ram lama chhungkaw thil tih khawm a tam hle tih social media hrang hranga mi hrang hrangin thlalak leh thu an dahah te a hmuh theih; a tam zawk phei chuan kum engemawchen tlang ruai siamnaa hmun chang pha meuh tawh lo – ‘hnah’ hmanga chawi ei an intihhmuh hle tih pawh a hriat theih bawk.

A bik takin khawpuia chengten hetiang hun hi an hmang uar lehzual niin a lang. Heng huna hmuh tur leh hriat tur awm fo chu, zai ho a ni a; chu’ng zaikhawmnaah chuan Lal piang lawmna hla, Mizo lengkhawm hla sa thawm hriat tur a awm nawk bawk. Kohhran inkhawma Krismas hla sak chu sawi loh, a ngaihthlak takngial pawh ngaithla ngai ta meuh lo te pawhin, hetiang ‘chhungkaw tihkhawm’ ah hian hlim tak leh tui taka Lal piang lawmna hla leh Kristian hla dang an sa hriat tur a awm chu he ‘chhungkaw kum’ tihlutu leh a hlawkna pakhat chu nia ngaih a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy