Daily Newspaper

Hrilen laia department pathuma hmalak dan sawi

13

Health & Family Welfare, Commerce & Industries leh Higher & Technical Education Department changtu, minister Dr R.Lalthangliana hoin heng department pathuma hotute leh govt. deputy chief whip Lalrintluanga Sailo bakah MLA te – Prof. F. Lalnunmawia, H. Biakzaua, C. Ngunlianchunga leh Andrew H. Thangliana te nen Ningani khan inrawnkhawmna neih a ni.

Consultative Committee hi kumina an thutkhawm vawikhatna a ni a. Minister chuan hrileng karah hmasawnna hna duh angin sawrkarin a thawk tha thei lo chungin, department hrang hrangin mipui leh ram hmasawnna tura theihtawp an chhuah chu lawmawm a tih thu a sawi a. A department chan hrang hranga thawktuten an hmalakna theuh leh an department-a thil thleng inhriatpawh tawn chu thil tul tak a nih avangin thutkhawm hi koh a ni tih a sawi.

Commerce & Industries-in Covid hrileng vanga sa leh thlai man to uchuaka zawrh a nih loh nana an hmalak dan an report a. Aizawl bawrhsap kaihhruaina hnuaiah department hrang hrang nen thawk hoin sa leh thlai man an bithliah thu te, hei hi khawpuia mi retheite tan a tangkai nia an hmuh thu te an sawi a. Man to tak taka sawrkarin a lei thin, PPE set chu veng hrang hranga puanthuite eizawnna khaihlak mek puihna ni pahfawmin, an thui tir dan an report bawk.

PPE set khat Rs.600 manin an thuitir a, puanthuitute hian PPE 50 zelah Rs.7500 an hlawh thei nia chhut a ni. A thawhkhatnaah puanthui 300 an ruai mek a, puanthui 600 rawih tumin scheme hi siam a ni. Tun dinhmunah PPE 200 Health department-ah an hlan tawh a, July 16 hian 3000 dang hlan leh a ni ang a, a vaiin PPE 36000 thui an tum tih an sawi.

‘Interest Subvention Scheme for Entrepreneurs’ leh ‘State Incentive Subsidy for MSME Sector hit by Covid-19’ hnuaiah Industries Department chuan cheng nuai 292 a chang a. Hemi hnuaia State Incentive Subsidy bikah entrepreneurs 44 hnenah cheng nuai 43 semchhuah a ni tawh a, Interest Subvention Scheme hnuaiah tanpuina dawng tur mi 180 thlan chhuah an ni tawh a ni.

H&TE department atanga report danin, Mizorama higher secondary school leh college-ah te hrileng mekah class kal theih a nih tak loh avangin, 2020 April 24 khan department chuan order tichhuakin online class neih thin a ni a. Sawrkarin zirlaite tan fee a tihhniam sak a, zirna tluang pangngai bakah rilru lama harsatna tawkte pui thei turin zirtirtute chu nikum July khan ‘counselling and mental health training’ neihtir an ni. RUSA chu phase II kalpui mek a ni a, college sak thar, cheithat leh mamawh lei kawngah nasa taka hma an lak bakah he scheme hnuaiah hian zirtirtu post 69 an hnawhkhat a ni.

H&FW department atanga report danin, tunah hian Covid vangin Mizoram hmun 43 chu containment leh micro containment zone-ah puan a ni a. Tun thlengin Mizoramah black fungus vei an la awm lo. Hmun hrang hrang atangin mi inphalten Mizoram tan oxygen concentrator 1066 a thlawnin an pe tawh a, chu’ng zinga 721 chu damdawi in leh CCC hmun hrang hranga hman turin thawn chhuah a ni. Oxygen plant hi a awmsa bakah Aizawl khawpui leh district headquarters tinah dah belh a ni dawn a. PM Cares atangin 1000 LPM pahnih – ZMC-a dah tur pakhat leh Civil Hospital Aizawl-a dah tur pakhat dawn a ni. Report hnuhnung berah ZMC-ah damlo 327 an awm a, Aizawla DCHC khum 159 awmnaah khum 129 ala ruak. Mizoram sawkarin CCC 56 a neih mekah damlo 1413 an awm a, 4C 199 awmah damlo 1110 an awm. Zemabawk Cancer hospital sak mek bawhzui dan sawi niin, thla 16 dangah chuan zawh theih beisei a ni. Cancer hemna khawl tha chi – Linear Accelarator (LINAC) khawl bun vek tawh a ni a, thawktute training pek mek niin tun thla tawpah hman tan theih beisei a ni. Inhemna khawl dang, Cobalt 60 machine Equinox 80 pawh Mizoram a thleng tawh a, a buntu tur engineer-te Covid an kai avangin install mai theih a ni lo a, bun theih thuai beisei a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy