Daily Newspaper

Hrileng karah no 4 man hnem

POST NEWS SERVICE

14

2020 atangin hri a leng a, mahse hrileng hian no 4 (heroin) a um kiang lo nge ni, man tur a la tam hle. Mizoram Excise & Narcotics (MEN) department chhinchhiahna enin hrileng karah ruihhlo a tam tih a lang.

MEN department hian nikum khan no 4 hi kg 11.710 an man a, hei hi a tam tham hle. Kuminah pawh an man leh teuh tawh a, June thla thleng khan kg 9.718 an man tawh.

Nikuma an man hi a tam tham khawp mai a, mahse kumin kum chanve chhunga an man zat hian a hlat lo.

No 4 hi kum ruk kum sarih vel atang khan Mizoramah a hluar nia sawi a ni a, MEN leh police te’n an man zat pawh a pung nasa.

MEN department hian 2015 khan kg 4.088 an man a, hei hi kum khat chhunga kg 4 an man tlin vawi khatna a ni. A hun lai chuan tam tih a hlawh a, no 4 hluarzia sawi nana hman tham a ni. 2017-ah phei chuan kg 6.186 an man tling ta daih mai a, 2018-ah kg 8.716 a tling leh dawrh bawk.

2019 khan kg 12.596 an man a, hei hi kg 10 a tlin vawi khatna a ni. A kum leh 2020-ah a hma kum aiin a tlem a, mahse kg 11.710 lai a la ni. Kuminah kum chanve chhungin an man hnem leh tawh hle.

Nikuma hri a len tirh lam, inkharkhip te a’n nih khan ruihhlo leh pawikhawihna dang pawh a tlem deuhvah ngaih a ni hman a, mahse no 4 hi a hma ang bawkin a hluar zui niin a lang.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy