Daily Newspaper

Hrileng karah vote thlak

11

Aizawl, August 28 :  August ni 27 kha Mizoramah Village Council (VC) leh Local Council (LC) inthlan ni a ni a, hrileng karah harsatna em em awm lovin mipuiin vote an thlak.

State Election Commissioner Laima Chozah chuan tluang takin mipuiin vote an thlak nia a hriat thu a sawi a, “Harsatna em em awm lovin kan inthlang niin kan hria a, kan lawm khawp mai. Kan hriat theih chinah complain kan dawng lo a,” tiin The Aizawl Post a hrilh.

Zing dar 7 atanga tlai dar 5 thlengin vote hi thlak theih a ni a, mahse tlai dar 5 hnua vote thlak an awm. Tlai dar 5-a inthlanna hmuna awm hmante chuan vote hi an thlak thei a ni. Tlai dar 5 hnu-a vote thlak hi an awm nual nia hriat a ni a, Aizawlah pawh dar 8 thleng te pawh an awm.

Hrilen laia inthlan a nih avangin State Election Commission (SEC), MPF leh YMA te’n inthlan hi him taka neih a nih theih nan vote thlakna hmunah ‘social distancing’ vawn an tum a, hmun thenkhatah chuan hei hi a hlawhtling lo hle nia ngaih a ni.

Thu dawn danin, veng leh khua azirin ‘social distancing’ zawm tha leh zawm tha lo hi an awm a, Aizawl aiin khaw dangin an zawm tha. Aizawlah chuan zawm tha awm tho mah se a zawm tha lo veng engemaw zat an awm. Inthlanna hmun hrang hranga kal kual police pakhat chuan, “Felfai leh buarchuar an awm a. Social distancing hi a zawm tha veng chuan an zawm tha a, an fakawm. A zawm tha lo vengah chuan inhnaih tak takin mipui an awm a. Aizawl bik chu social distancing chungchangah hian duhthu a sam lo. Inthlan dang ang em em chu a ni lo a ni mai a, mahse zawm that lohna vengah chuan buaithlak tak a ni,” tiin The Aizawl Post a hrilh.

Inthlanna hmunah intlarte dinna tur rin bial a awm a, thutthleng hniam chi chhawp a lar bawk. Mahse chutiang tihna hmunah pawh chuan hung pawnah mi an awmkhawm tuau tuauna te a awm tho.

Vote thlak ni hian Congress party chuan inthlang rih lote inthlan hunah a ruala vote chhiar ni se tiin SEC-ah an ngen a, mahse vote thlak zawhah vote hi chhiar a ni.

Election commissioner Laima Chozah chuan, “Dan a awm alawm. Danah chuan vote thlak zawhah chhiar nghal tur a ni a, chuvangin chhiar nghal a ngai. Keiina ka duh leh duh loh lam a ni lo a, dan zawm a ngai,” tiin hemi chungchang hi a sawi.

Vote tla zat hi hriat theih a ni rih lo a, SEC-in Ningani zan dar 9 thlenga ‘provisional abstract voter turnour report an siamah chuan VC bikah vote awm zawng zawng atanga 64.29% a tla. Khawzawl District-ah a tla tha ber a, 76.88% a tla. Hnahthial District-ah pawh 74.86% a tla.

Local Council-ah chuan chhun dar 12 thleng khan vote hi 16.97 a tla a, Aizawlah hian chawhnu lamah vote thlak an pung nia hriat a ni.

Local Council-ah hian veng 24-ah inthlan hi sawn a ni a, Thawhlehni leh Nilaini chhunah te order a chhuah hnuah Nilaini zanah Mission Vengthlang, Khatla South leh Lawipu tea inthlan hun sawnna order a chhuak leh a ni. VC pasarih leh LC 24-ah inthlan hun hi sawn a ni.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy