Daily Newspaper

Hrileng vanga tam lo thleng thei laka inbuatsaih rel

13

Aizawl, December 10 : Nilaini khan Mizoram Synod Inkhawmpui-ah palaite’n ro an rel tan a, hrileng vanga tam lo thleng thei laka inbuatsaih an rel.

Covid-19 hrilen kuma inkhawmpuiah hian Covid-19 vanga tam lo thleng thei laka inbuatsaihna chungchang an rel a, Ramlai Presbytery atanga lut ‘Covid-19 (hripui) leng avanga tam lo thleng thei lakah ruahmanna Synod-in siam rawh se’ tih chu palaite’n an pass a ni.

He thu hi an pawm a, Synod Executive Committee (SEC) bawhzui turin an dah. Synod kalphungah chuan SEC hian thutkhawm leh hmasak berah an ngaihtuah thin.

Tun tumah hian Kolasib Presbytery atanga lut ‘Ei leh bara kan intodelh theihna turin Synod-in hma la rawh se’ tih pawh an pass a, hei pawh hi SEC bawhzui turin an dah.

‘Kohhran ni pawimawh – Tumkau Ni-a kan au rual thin inkaihhruaina Synod-in siam rawh se’ tih pawh an ngaihtuah a, hei hi a tlang lo.

Rorel tan ni hian general agenda pali an ngaihtuah hman a, Pastor leh Pro Pastor awmna tur leh insawnna tur chungchangin hun a lak rei avangin agenda hi an ngaihtuah hnem hman ta lo tih thu dawn a ni.

Rorel tan ni hian moderator thar Rev Dr C Lalhlira’n moderator kalchhuak tur Rev R Lalchangliana hnen atangin charge a la a, rorel a kaihruai nghal a ni.

Tun tum inkhawmpuiah hian Mizoram sorkarin mi 300 aia tam lo kalkhawm a remti a, palaite leh inkhawmpui thlen hnathawktute hi Rapid Antigen Test hmanga enfiah an ni.

Thu dawn danin, rorel tan ni hian palai hi 251 an ni a, Thawhlehni-a endik mi 301-te bakah mi dang endik leh an awm. Palaite’n hmai an tuam a, rorel inkhawmah inkar hlata an thut bakah puipate leh palaite’n hmai an tuam hlawm.

2020 Synod Inkhawmpuiah hian moderator chu Rev Dr C Lalhlira a ni a, secretary (senior) chu Rev Vanlalrova Khiangte, secretary (junior) chu Upa Lalrinmuana, finance secretary chu Rev B sangthanga leh Rev Lalramliana Pachuau, statistician chu Rev J Lalremsiama a ni. Nakkum Synod chu Republic Veng biak ina nghah an rel a, moderator tur chu Rev Dr Vanlalnghaka Ralte a ni.

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy